كيك بوبس بالشوكولاتة الرخامية

أكيد مصطلح الكيك بوبس أو كرات الكيك ماهو جديد، وأكيد الكل سمعه قبل كده. لكن اللي مو الكل يعرفوه هو انه بالامكان تحضيره في البيت بكل سهولة. يبغاله وقت و طولة بال وبس ـ لا فن ولا شطارة ولا مهارة في الخبز.

طبعا الكيك بوبس – لو لسه في أحد ما يعرف ايش هو – عبارة عن كيك أخبزه وأفتته وأعجنه بأي نكهة أبغاها: نوتيلا، زبدة الفول السوداني، زبدة اللوتس أو كريمة الكيك اللي تنباع جاهزة في المحلات، وأكوره وأغطسه في الشوكولاتة. فكرة البوبس جات من الحلاوة المصاص اللي اسمها بالانجليزي لولي بوب، عشان يسهل تغميسه وتزيينه وأكله عادة يغرس في كل كيكة عود صغير. فتصير كيكة بعود اللولي بوب = كيك بوب.

اليوم حأشارككم وصفة الكيك بوبس المعتمدة عندي وكيف قدرت أسوي تأثير رخامي بالشّوكولاتة على الكيك بوبس اللي سويتها. للأسف اني أحيانا أحب اني أعقد الأشياء البسيطة فاذا مالكم مراق لحوسة ثلاثة ألوان من الشوكولاتة بامكانكم تغطّسوها في أي شوكولاتة وتزينوها بشكل عشوائي بسيط زي كده:

لكن اذا عندكم فضول نعرفوا كيف يصير الشكل الرخامي المموج بالشوكولاتة خليكم معايا للأخير.

المقادير:

علبة بيتي كروكر كيكة بنكهة شوكولاتة سوداء أو فدج الشوكولاتة

3 بيضات

زيت و ماء حسب المطلوب على علبة الكيكة

2-3 ملاعق كبيرة نوتيلا

300 جرام شوكولاتة بيضاء

200 جرام شوكولاتة بالحليب

100 جرام شوكولاته غامقة

أعواد خشبية قصيرة أو أعواد الكيك بوبس (موجودة في ليكلاند)

الطريقة:

1. حضرت وخبزت كيكة البيتي كروكر بالشوكولاتة حسب التعليمات اللي موجودة عالعلبة، وطلعتها من الفرن وتركتها تبرد الين صرت أتحمل أمسكها بيدي. قلبتها بكبرها في زبدية وفتتها بأطراف أصابعي. أضفت عليها النوتيلا ملعقة ملعقة وعجنتها الين صارت ناعمة وتتشكل وتمسك نفسها لمن اضغطها في يدي.

2. باستخدام ملعقة القياس (مقاس ملعقة كبيرة) أخدت كميات متساوية من الكيك المعجون وكورتها في راحة يدي وحطيت كل الكور- بدون ما تتلامس - على صينية خبز مفرود عليها ورق مشمع. بعد ما كوّرت كل الكمية دخلت الصينية المليانة كور للفريزر وتركتها هناك الين خلصت كل الخطوات الجاية.

2. عبال ما تبرد كور الكيك، ذوبت جزء من الشوكولاتة البيضا بإني كسرت اللوح في كاسة عميقة - كاسة النوتيلا المقاس الصغير ممتازة لدا الغرض - ودخلتها في المايكرويف لمدة 30 ثانية وطلعتها حركتها شوية بسكينة بلاستيك ورجعتها المايكرويف لمدة 20 ثانية وطلعتها حركتها ورجعتها لمدة 10 ثواني وطلعتها حركتها وكررت تحميتها لمدة 10 ثواني وتقليبها الين ذابت تماما. مهم اني انتبه بالذات في الشوكولاتة البيضا انه ما أسخّنها أكتر من اللازم لأنها "تنحرق" وتصير متكتلة وقوامها يصير زي الصلصال.

3. خرجت كور الكيك من الفريزر و غطست 1سم من كل عود في الشوكولاتة وغزّيته في كورة كيك - الاعواد لازم تدخل لدرجة عميقة وسط كور الكيك لكن مو للأخير- هذه الخطوة تضمن ثبات الكور على الأعواد في الخطوة اللي بعدها بحيث ما تطيح ولا تدور. غزيت كل الكور بأعواد ورجعت الصينية بالكور في الفريزر.

نصائح ذهبية:

- مهم جدا في الخطوة الجاية انه الشوكولاتة تكون أسيل ما يمكن وضروري يكون قريب مني مايكرويف بحيث انه كل ما حسيت انه الشوكولاتة بردت وزادت كثافتها ارجع أحطها في المايكرويف 10-15 ثانية عشان ترجع سايلة وقوامها رقيق، هذا الشي يسهل انها تجمد بعد التغطيس ويضمن انه طبقة الشوكولاتة اللي حول الكيك تكون رقيقة.

- كل ما كان الكيك بارد كل ما جمدت الشوكولاتة عليه أسرع فخلال التغطيس أترك الصينية في الفريزر وأخرج 4-5 حبات أغطّسها في الشوكولاتة وأرجّعها الفريزر وأخد 4-5 تانيين، بالطريقة دي حيقل وقت الشغل لانه الشوكولاتة حتجمد بسرعة وحتقل الفوضى والتنقيط من الشوكولاتة الذايبة على أسطح المطبخ.

4. ذوبت باقي الشوكولاتة البيضا وذوبت الشوكولاتة الغامقة واللي بالحليب فصار الان عندي 3 كاسات فيها 3 الوان مختلفة من الشوكولاتة وحطيت سكينة بلاستيك في كاسات الشوكولاتة الغامقة واللي بالحليب عشان التذويب المستقبلي وعشان انقل بها الشوكولاتات لكوب الشوكولاتة البيضا. طبعا لأنه الشوكولاتة البيضا عندي هي اللي كميتها أكبر فهي اللي حألوّنها بالنّوعين التانيين من الشوكولاتة و حأغطّس الكور فيها.

عشان تقدروا تتخيلوا معايا الوصف اللي في الخطوة الجاية شوفوا الفيديو دا - من الدقيقة 5:20 - وبعدين كملوا قراءة الخطوات:

5. قبل ما أغطس كل كورة كنت أخذ غرفة أو غرفتين - باستخدام السكينة البلاستيك- من كل لون شوكولاتة وأرشّها عشوائي على سطح الشوكولاتة البيضا وبعدين أغطّس كورة الكيك بشكل عمودي في الكاسة الين تتغطى تماما وأدوّرها على خفيف و أنا بأخرّجها من الشوكولاتة. بعدين أميّلها بحيث تصير بشكل أفقي فوق الكاسة وأهزّها بشويش عشان أطيح الشوكولاتة الزّايدة منها في وسط كاسة الشوكولاتة. أرفعها وأستنّى عليها شوية حألاحظ انه لمعة الشوكولاتة الذّايبة بدأت تختفي وهذا معناه انه الشوكولاتة جمدت فأدخل الكورة المشكلطة للفريزر و أوقفها مكانها في الصينية. وهكذا الين تنتهي كل الكور. وبس!

أنا عارفة انه الوصفة دي تستهلك وقت مو صاحي لكن النتيجة النهائية في نظري تستاهل، أروع كيك بوبس سويتها في حياتي. شكرا انكم وصلتوا معايا لدي النقطة من التدوينة، أنستوني في الشويتين دي،

أشوفكم على خير، x X

#حلويات #مخبوزات #شوكولاتة #كيكة #نوتيلا #وصفة #دسم #أكل #مفضلة