تشيز كيك التوت البري - مترجمة

وحدة من الأكلات اللي مو دائماً أشتهيها لانه يندر أنها تعجبني وذوقي فيها مرة صعب هي التشيزكيك.

مهم جدا عندي قوامها ونكهتها وتوازن الحلا وخفة طبقة البسكوت فيها. القوام الجبني بزيادة والقوام الرغوي اللي قريب من الدريم ويب ما استسيغه. النكهة مع انه قليل اللي يزبطوها الا أني أفضل انه يكون فيها لمسة فانيليا أحسها تحول الجبنة المالحة الى جبنة حلويات. توازن الحلا أعرف انه تفضيل شخصي، ناس تحب حلوياتها تشرق وناس تحبها حلاها الحد بالقد. وطبقة البسكوت اللي تجي في معظم التشيز كيكات اللي في السوق: قاسية وفيها نكهة زبدة قوييية تخرب علي التشيز كيك كله.

الخلاصة - بعد الدلع والتشرط دا كله - انه وصفة اليوم مثالية تماما في نظري من كل الجوانب، تنجح في تقييمي الشخصي بعلامة كاملة.

الوصفة أخدتها من موقع جوي أول بيكنج دوت كوم و طبقتها أكثر من مرة وغيرت فيها أشياء بسيطة .. حأرفق الفيديو حق الطريقة واللي تتكلم فيه صاحبة الوصفة بالتفصيل عن المقادير والبدائل والطريقة وليش سوت كده وليش المفروض كده. انصحكم تشوفوه قبل لا تجربوا الوصفة لأنه جدا مفيد في فهم حاجات كتير متعلقة بالتشيزكيك دا.

قبل لا أعطيكم الطريقة لازم تعملوا حساب انه التحضير يتقطع على مدى يومين و تتقدم اليوم الثالث. صوص التوت يصير ويدخل الثلاجة قبل بيوم من البدء بتحضير خلطة التشيزكيك والتشيزكيك يفضل لو يجلس يوم كامل في الثلاجة.

المقادير:

صوص التوت/

٢٢٥ غم (كوبين وربع) توت كرانبيري طازج أو مجمد

١٠٠ غم (نص كوب) سكر أبيض ناعم

٣٢٠ غم (كوب وثلث) ماء

طبقة البسكوت/

٢٠٠غم (كوبين) بسكوت دايجستف مطحون

١٠٠غم (كوب) بسكوت لوتس مطحون

١٠٠غم (اصبع) زبدة ذايبة

خلطة التشيزكيك/ جميع المقادير بدرجة حرارة الغرفة

٦٨٠غم جبن فيلاديلفيا كامل الدسم

٢٠٠غم (كوب) سكر أبيض ناعم

نص ملعقة صغيرة ملح

١٢غم (ملعقة كبيرة) دقيق متعدد الاستخدامات

٤ بيضات

١٥غم (ملعقة كبيرة) كريمة خفق

٦غم (ملعقة صغيرة ونص) فانيليا

الطريقة:

1. حضرت صلصة التوت: في قدر صغير حطيت التوت و السكر والموية وفتحت عليه العين على حرارة عالية الين بدأ يغلي وطيته لدرجة حرارة متوسطة منخفضة وتركته يفور لمدة ٣٠ دقيقة تقريبا مع التقليب المستمر الين صار قوامه زي المربى. صفيته وتركته يبرد تماما وبعدين دخلته الثلاجة الين تاني يوم، خرجته مع باقي مقادير التشيز كيك عشان يصير بحرارة الغرفة.

2. اليوم اللي بعده شغلت الفرن على درجة حرارة 350 ْ ف وبدأت تحضير التشيز كيك.

3. جهزت طبقة البسكوت: خلطت نوعين البسكوت وأضفت لهم الزبدة وقلبتهم الين تأكدت انه الزبدة توزعت مزبوط، دهنت جوانب صينية تشيز كيك بشوية زبدة -بخاخ الزبدة أظنه أنسب- وفردت خليط البسكوت ودكيته باستخدام زبدية قاعها مسطح ودخلته الفرن لمدة 6-8 دقايق وخرجته يبرد شوية عبال ما أكمل باقي الخطوات.

4. خليط التشيزكيك جدا بسيط: بالخلاط -أنا استخدمت الوقافي حق كتشن ايد بالقطعة المثلثة على سرعة متوسطة- حطيت الجبن الفيلاديلفيا في زبدية وخفقته الين صار ناعم ومافيه كتل أضفت عليه السكر والملح والدقيق وخفقته الين يادوب تمازجت المكونات. أضفت البيض وحدة وحدة مع التقليب بعد كل إضافة بيضة الين تنخلط تماما وبعد البيضة الرابعة وقفت الخلاط وبالملعقة قلبت الجبن الملتصق في قاع الزبدية لأنه ما كان بينخلط معاهم ورجعت شغلت الخلاط عالبطيء وأضفت كريمة الخفق والفانيلا الين يادوب تمازجت ووقفت الخلاط.

5. صبيت نص خليط التشيز كيك فوق البسكوت اللي في الصينية. غرفت ملاعق متباعدة من صلصة التوت متوزعة على سطح خليط الجبن وبالسكينة طبقت حركة التأثير الرخامي عشان تتداخل الصلصة والخليط. بالملعقة غرفت الباقي من خليط التشيز كيك بحذر فوق الشكل الرخامي اللي سويته الين اتغطى تماما، وبعدين حاولت اني اغرف دوائر متساوية في الحجم، بترتيب حلزوني يبدأ من الوسط على سطح التشيز كيك. وأخر شي مررت السكينة في منتصفات الدوائر بخط واحد متصل: من الدائرة اللي في وسط الصينية الين أخر دائرة في الترتيب الحلزوني، فصار شكلها كأنها قلوب متصلة.

6. دخلتها الفرن لمدة ربع ساعة وبعدين وطيت الحرارة الى 250 ْف وتركتها في الفرن لمدة 60-70 دقيقة الين صار قوامها متماسك على أطراف الصينية ولسه تهتز من الوسط زي الجيلي. أول ما خرجتها مررت سكينة صغيرة وحادة على جوانب التشيزكيك ساير ما يدور عشان لا يتشقق سطحها وتركتها على الكاونتر الين بردت تماما وبعدين غطيتها بنايلون شفاف ودخلتها الثلاجة الين ثاني يوم. طبعا هي تجلس في الثلاجة 4-5 ايام وما يصير لها شي وكلما بردت أكثر كلما كانت ألذ.

الخطوات مرة سهلة بس تاخذ وقت ، فيفضل انه التحضير يبدأ أقل شي قبل الضيوف ب 3 أيام. جربوها وصوروها وحطوها عالانستقرام ومنشنوني ladyhblog@

هذا فيديو الوصفة الأصلية شوفوه لأنه تطبخ وتشرح، بالذات اذا الوصفة الكتابية كانت معقدة شويتين:

بالعافية مقدما .. وأشوفكم على خير Xx

#مخبوزات #حلو #أكل #وصفة #توت #تشيزكيك #حلويات #دسم