بان كيك بصلصة التفاح المكرمل

دخل ديسمبر! ومع انه ما دخل البرد مزبوط بس صحيت اليوم وانا حاسة نفسي في مزاج خريفي.

مافي شي بالنسبة لي يمثل الخريف أكتر من التفاح - واليقطين طبعا بس الين دحين ما عمري غامرت بتجربة وصفاته - فقررت انه فطورنا اليوم يكون بان كيك و أسوي صوص بالتفاح والكاراميل والقرفة ينحط فوقه ويعيشني الخريف اللي بأتهيأه.

البان كيك حيكون بوصفته الأساسية بدون أي اضافات لأنه بنتي الوسطانية ما تستسيغ قوام التفاح المطبوخ فتقدر هي واللي منكم زيها تاكله بالعسل أو بالنوتيلا أو بأي سيروب تفضله.

ما حأطول عليكم حأترككم للوصفة..

المقادير:

البان كيك: (تكفي 4 أشخاص)

كوبين دقيق

4 ملاعق كبيرة سكر

4 ملاعق صغيرة بيكنج باودر

نص ملعقة ملح

كوب و نص الى كوبين حليب

بيضتين

60 جم (4 ملاعق كبيرة) زبدة، مذابة

صلصة التفاح:

تفاحتين جالا، مقشرة ومقطعة شرايح رقيقة

20 غم زبدة

ملعقة صغيرة نشا ذرة

ربع كوب موية باردة

ربع كوب سكر بني

نص ملعقة صغيرة قرفة مطحونة

الطريقة:

1. خلطت الدقيق والبيكنج باودر والسكر والملح في زبدية متوسطة وقلبتها بسلك الخفق. فقشت البيضات في وعاء خارجي وحطيت عليها الحليب وخلطتهم على خفيف و صبيتهم عالمقادير الجافة وقلبتهم الين صار الخليط متجانس. صبيت الزبدة الذايبة على خليط البان كيك وقلبته مرة تانية الين صار قوامه ناعم وبدون أي كتل.

2. سخنت الطاوة على عين متوسطة هادئة وعشان أضمن تناسق احجام البان كيك استخدمت مقياس الربع كوب لصب الخليط في الطاوة، تركتها على الجهة الأولى الين بدأت تطلع فقاقيع على الوجه وصار محيط البان كيكة الأقرب للطاوة مو لامع، قلبتها وتركتها على الوجه التاني الين بدأت أشوف لون البان كيك الملاصق للطاوة بدأ يتحمر فشلتها عالصحن. وكررت الخطوة دي الين انتهى خليط البان كيك ودخلت الصحن في فرن شغال على أوطى شي بس عشان يفضل دافي الين أخلص الخطوة اللي بعدها.

3. ذوبت الزبدة في طاوة عميقة على حرارة متوسطة عالية، حطيت عليها التفاح وقلبته الين ذبل معظمه وبدأت أطراف بعض القطع تتكرمل، ذوبت النشا في الموية الباردة وصبيته على التفاح ولحقته بالسكر البني والقرفة وقلبتهم مزبوط الين تأكدت انه مابقي من كتل السكر شي. وقتها اذا حسيت انه الصوص اللي حول التفاح قليل أو كثيف ممكن أضيف موية شوية الين أوصل للكثافة اللي أبغاها. تركته يغلي تقريبا دقيقتين وعيني عليه عشان لا يلصق وللا تقل مويته كتير عن المطلوب وطفيته ونقلته مباشرة لصحن التقديم. وبس!

نكهة الكاراميل والقرفة مع قطع التفاح الذايبة على البان كيك الاسفنجي الطري كانت مثاليييييييية. لازم تجربوها وتوروني تطبيقاتكم عالانستجرام: ladyhblog@ اعملولي تاق أو منشنوني على تجربتكم لو حساباتكم عامة أو أرسلولي هي دايركت لو حساباتكم خاصة، أحب أشوف تطبيقاتكم. وصفة البان كيك مستوحاة بشكل شبه كامل من كتاب مختارات شهية.

أشوفكم على خير Xx

#فطور #حلو #دسم #مفضلة #تفاح #كراميل #قرفة #بانكيك #وصفة #أكل #بسيطة