البوريك السريع بحشوة اللحم

البريك أخو السمبوسة، بس على قد ما السمبوسة شكلها مرتب ومثلثات ويبغالها وقت وتتسوى حبة حبة؛ على قد ما البريك سهل وسريع وعشوائي.

مشكلتي الأزلية معاه هي تساقط الحشوة لأنه الطريقة الأصلية للبريك هي أني أفرد كم طبقة عجينة، وأوزع فوقها الحشوة وشرايح البيض المسلوق وأغطيها بكم طبقة عجينة، وأسقّيها بمرقة لحم أو دجاج وتنخبز في الفرن.

وقت الأكل نقطعها مربعات و تصير حواف القطعة مفتوحة و الحشوة تتساقط بسهولة خصوصا في أيدي الأطفال. وأنقهر على اللحم والبض اللي طاح في الأرض وحيترمي في الزبالة.

وأخيرا لقيت الحل: بريك على شكل بوريك.

وقت التقطيع بالإمكان أكل كل لفة لحالها زي السبرينج رول ودا الشي قلل كثير من الفتافيت والحشوة اللي تضيع في الأرض.

المقادير:

2 م.ك. زيت زيتون

بصلة صغيرة مقطعة ناعم

500 غم لحم مفروم

ملح وفلفل أسود

م.ص. كمون (اختياري)

ثلث حزمة بقدونس

ثلث حزمة شبت مفروم (اختياري)

4-3 بيضات مسلوقة مقطعة مكعبات

6 شرايح عجينة الفيلو

40 غم زبدة سايحة

4 م.ك. حليب

الطريقة:

1- حضرت الحشوة: ذبلت البصل في ملعقتين الزيت الين بدأت أطرافه تتحمر أضفت عليه اللحم المفروم وقلبته باستمرار الين تفككت كتل اللحم وأضفت له الملح و الفلفل الأسود و الكمون، وتركته يطبخ مع التقليب من فترة للثانية الين تبخرت معظم مويته وشلته عن العين. أضفت البقدونس والشبت والبيض وقلبته ورفعته على جنب.

2- سخنت الفرن على درجة حرارة 350. رصيت كل 3 شرايح فيلو مستطيلة جنب بعض مع تداخل بسيط بحيث يكون نهاية الشريحة الأولى تحت بداية الشريحة الثانية و نهاية الشريحة الثانية تحت بداية الشريحة الثالثة. الين كوّنت مستطيل عرضه بعرض وحدة شريحة و طوله بطول 3 شرايح تقريبا. وجبت زبدية فيها موية و غطست أصابعي و بللت فيها الجزء المتداخل من الشرايح عشان يلصقوا في بعض.

3- على امتداد المستطيل من الجهة الطويلة تركت مسافة بسيطة وحطيت نص كمية الحشوة على شكل خط من أول المستطيل لآخره. ثنيت الطرف اللي تركته من العجينةعلى خط الحشوة و بدأت ألف بالتدريج: لفيت الجزء اليمين شوية وبعدين لفيت الوسط عشان يصير ملفوف زيه و بعدين اليسار واستمريت بنفس اللف التدريجي الين صار معايا أنبوب عجينة محشي باللحم. من أحد الأطراف بدأت ألف الأنبوب على نفسه بشكل حلزوني الين صار على شكل قرص دائري.

4- زحلقت قرص البريك في صينية الكيك الدائرية و دهنت الوجه و الجوانب بخليط الزبدة السايحة والحليب ودخلته الفرن لمدة 20 دقيقة أو الين يتحمر الوجه و الأطراف. وبس والله!

الوصف ياخد وقت والشرح طويل لكن التطبيق سهل وسريع، جربوه و صوروه و أرسلولي الصور على الانستجرام (ladyhblog@) أو سووا لي تاق في الصورة عشان أشوف فنكم و ابداعكم.

أشوفكم على خير Xx