الايس كريم المنزلي بالشوكولاتة والبراوني - مترجمة
- Manar
- Nov 20, 2017
- 2 min read
Updated: Apr 24, 2022
عمره خطر على بالكم وانتو بتاكلوا ايس كريم الشوكولاتة انه "ياليت معاه براوني" أو "ياليت لو مافيه مكسرات" أو "أما لو كان في وسطه قطع شوكولاتة محشية كاراميل كان صار خرااافي"؟
وهل كنتوا تتخيلوا انكم تقدروا تسووا ايس كريم شوكولاتة فاخر بس بثلاثة مقادير؟ وتضيفوا له المكونات اللي تبغوها بزيادة أو نقصان زي ما تفضلوه بالضبط!
اليوم انا جايبة لكم وصفة تيستي لآيس كريم الشوكولاتة أبوالثلاثة مقادير وحأضيف عليها المكونات اللي تخليه مثالي في نظري، طبعا الوصفة دي جربتها بمتغيرات مختلفة من ضمنها نسبة الشوكولاتة و نوع كريمة الخفق وكمية البراوني في الايس كريم الين وصلت للتوازن المطلوب بين الحلاوة والكريمية والمرارة.
اذا تحبوا تشوفوا الفيديو اللي اخذت منه الوصفة حأدرجه تحت الوصفة المكتوبة: عبارة عن وصفتين اساسية لأيسكريم الشوكولاتة بدون اضافات، اللي جربتها انا وأضفت عليها هي الوصفة الأولى.
تحذير: لذيذ لدرجة الادمان
المقادير:
كوبين (٥٠٠ مل) كريمة خفق (نسبة الدهن فيها تكون أقرب ما يمكن ل 35% )
علبة كاملة حليب مركز محلى
٢٩٠ غم شوكولاتة غامقة (٧٠٪)
الاضافات:
براوني (حسب الرغبة)
شوكولاتة غامقة مهروشة بالسكينة احجام متفاوتة (حسب الرغبة)
الطريقة:
جهزت الاضافات حقتي. خبزت صينية براوني وقطعت ثلثها تقريبا لقطع مقاس 1سم1xسم وتركتها تبرد تماما. دخلت زبدية ستانلس ستيل فاضية في الفريزر عالأقل لمدة ١٥ دقيقة قبل ما استخدمها.
في زبدية زجاجية كسرت الشوكولاتة وصبيت عليها الحليب المركز ودخلتها المايكرويف ٣٠ ثانية في ٣٠ ثانية في ٣٠ ثانية وبعد كل مرة أخرجها اقلبها وارجعها الين ذابت الشوكولاتة تماما وصار المزيج كثيف تركتها على جنب عشان تبرد وطلعت الزبدية من الفريزر وصبيت فيها كريمة الخفق وباستخدام الخفاق الكهربائي خفقتها الين وصلت مرحلة الstiff peaks اللي لمن أوقف الخفق واخرج الخلاط من الكريمة تبقى بوزتين من الكريمة محتفظة بشكلها مكان المضارب ولا ترتخي.
أخدت ملعقتين من الكريمة وحطيتها على خليط الشوكولاتة وقلبته الين انمزجت تماما بعدين خلطتها مع باقي الكريمة بالتقليب الخفيف الين يادوووب اتمازجت أهم شي انه ما يبقى فيها كتل كبيرة من الكريمة. حطيت عليها البراوني والشوكولاتة المهروشة وقلبتها اقل فترة ممكنة بحيث تتوزع الاضافات الى حد ما بالتساوي في الايسكريم. وصبيتها في صينية مستطيلة ودخلتها الفريزر لمدة ما تقل عن ٤ ساعات، وبالعافية.
وهذا الفيديو:
جربوها ترى اسهل مما تتخيلوا والنتيجة بالمرة لذيذة وقابلة للتطوير والتغيير ، اضيفوا له جوز أو مارشميلو أو حتى حلاوة رولو واستمتعوا بالتكوينات الجديدة في كل مرة.
Comments