SORTEDfoodتجربة وصْفة: الكالزوني على طريقة
- Manar
- Nov 27, 2016
- 1 min read
أنا وبناتي نحب نتفرج على فديوهات الطبخ عاليوتيوب، ففي يوم كنا بنقلب من فيديو لفيديو وطبينا على فيديو وصفة الكالزوني على قناة SORTEDfood البريطانية، الغريبة انه بعد ماخلص الفيديو بشوية كان الدقيق واصل لكوعي. :-)
عشان أكون عادلة في فصفصة هذه الوصفة لازم أقول انه ماكانت عندي كل المكونات اللي قالوا عنها في الفيديو، فاستخدمت نوع مختلف من الدقيق والحشوة كانت من المتوفر في ثلاجتي ومخزني.
هذا الفيديو اللي ألهم أحداث هذاك اليوم:
الشي اللي يميز قناة SORTEDfood انه وصفاتهم مبسطة ودائماً مزبوطة ونتايجها مضمونة -طبعا دا الكلام صحيح لمن أمشي عالوصفة بالضبط بدون تأليف- وعشان كده هم مصدري الموثوق للوصفات عاليوتيوب وبعدهم Tasty و Tastemade.
دي المرة كان مطلوب نوع من الدقيق اسمه Strong flour و زي ما انتو عارفين في السعودية ما عندنا الا الدقيق العادي (All purpose) ويالله يالله نلاقي ذاتي التخمير (Self-rising) فالعجينة ما طلعت معايا مزبوطة زي ما سووها في الفيديو. بغض النظر عن فشل العجينة، كانت عشوة لذيذة بناتي استمتعوا بيها أكثر من البيتزا المعتادة بسبب عامل المفاجأة في اختلاف الحشوات بين كل حبة كالزوني خبزتها داك اليوم.
جربنا حشوتين مختلفة:
حشوة "نسواز" كانت عبارة عن تونا و بيض وزيتون و شوية جبن أبيض وحشوة "بولونيز" بصلصة البيتزا واللحم المفروم ورشة من جبنة البارميزان.
الحكم النهائي:
الفكرة حلوة وتغيير عن البيتزا المعتادة ومجال التنويع فيها كبير بما انه الحشوة مغطية وما حتنشف في الفرن، لكن بما انه نوع الدقيق اللي طلبوه في الوصفة ماهو سهل يتلاقى -هذا اذا كان موجود في البلد- وبما انها العجينة ما زبطت بالدقيق العادي فللأسف ما أظن اني حأعتمد الوصفة دي مستقبلا للكالزوني.
شكرا على تواجدكم معايا اليوم ،
أشوفكم على خير، XO
コメント