كتاب: نظمي الآن! نهاية الأسبوع الخامس

وخلصنا الأسبوع الخامس، أسبوع تنظيم المعلومات الشخصية. الأسابيع اللي قبله 1و 2 و3 و 4 كانت تتعلق بتنظيم الذات. من وقت ما كتبت التدوينة حقت أهداف الأسبوع هذا و انا متخيلة ايش حيكون تطبيقي لها. طبعا ما يحتاج أذكركم انه المثال اللي حطته المؤلفة هو مجرد مثال: تاخدوا منه وتتركوا وتضيفوا عليه. خليني أخدكم خطوة خطوة:

صممت بطاقات لها لسان في برنامج silhouette studio عرضها أقل ب3-4 ملم من عرض الصندوق اللي اخترته و طولها باللسان أقصر بشوية من طول الصندوق عشان تدخل وينقفل عليها بالراحة.

طبعتها وقصيتها وكتبت على اللسان حق كل بطاقة نوع المعلومات اللي حأسجلها عليها.

ولانه صندوقي فيه مجال فحطيت فيه جهاز قياس السكر المنزلي بحيث كل ما قست أسجل.

الأقسام اللي حسيت اني أحتاجها هي كالتالي:

• في مجموعة المعلومات المالية كتبت أرقام البطاقات وتواريخ انتهاءها والبنوك التابعة لها، وكتبت ارقام الحسابات البنكية باسم صاحب الحساب و في أيت بنك وايش الآيبان حقها.

• في مجموعة المعلومات الصحية خصصت بطاقة لكل من نتايج فحص الكوليسترول والضغط والسكر وبطاقة لمسببات الحساسية لأفراد العيلة و بطافة فصائل دم كل منهم. شكلي كمان حأضيف بطاقة تطعيمات لبناتي الوسط والصغيرة.

• في مجموعة المعلومات الطارئة خصصت بطاقة لأرقام الطوارئ وبطاقة لمعلومات السيارة وخصصت بطاقة تجريبية لبيانات الرحلات الجوية أبغى أشوف لأي مدى في فايدة منها لأنه في الزمن دا كل المعلومات هذه مسجلة أون لاين. وقصيت جيبين ورقيين لصقتهم على البطاقات اللي خصصتها لصور جوازات السفر والصور الحديثة لأفراد العائلة.

• في مجموعة الاحتياط خصصت بطاقات لكل من محيط وسطي وصدري وأردافي ورقبتي ووزني، بدامي حاليا بانتبه لصحتي قررت اني الصق على كل وحدة منهم ورقة رسم بياني واسجل بياناتي بشكل أسبوعي وأشوف كيف. برضه خصصت بطاقة لكل وحدة من بناتي فيها قياساتهم: الطول، محيط الصدر والوسط و الأرداف. عشان لو في مرة قررت أشتري لهم شي أون لاين وهم في المدرسة وللا نايمين وللا شي.

وبس والله .. كيف طبقتوا أهداف الأسبوع الخامس؟ وايش اضفتوا على مثال المؤلفة حاجة أنا ما أضفتها؟ استخدموا هاش تاق #أنا_منظمة عالانستجرام @ladyhblog اذا كانت حساباتكم مفتوحة ووروني تطبيقاتكم واذا كانت خاصة ارسلوا لي تطبيقاتكم عالخاص. أحب أشوف ايش بتسووا حمسوني وشجعوني.

أشوفكم على خيرXx

#تنظيم #ترتيب #كتابمترجم #اسلوبحياة #تحدي #نظميالآن