كتاب نظمي الآن! الأسبوع السادس عشر

قارئاتي المنظمات،

أعتذر عن انقطاعي الطويل ، لكن كلكم مسؤولات وتعرفوا كيف الأولويات تتغير من فترة للثانية.

أهداف هذا الأسبوع متعلقة بتنظيم شنطة اليد و المحفظة، وبما اني مقبلة على سفر خلال فترة العيد فكانت أهداف هذا الأسبوع ضمن أولوياتي وبالتالي قررت أدونها وألخصها وأصورها لكم عشان اتشجع وأنجزوأستفيد وأفيد بإذن الله.

اذا كان هذا أول موضوع يمر عليكي في سلسلة نظمي الأن! وأعجبتك الفكرة والمحتوى وحابة تبدأي من البداية أو تتطلعي على الأسابيع السابقة تفضلي على صفحة نظمي الآن.

كم مرة حصلت انك:

تذكري انه كان عندك قلم في الشنطة ووقت ما تحتاجيه بسرعة تدوري عليه ماتلاقيه؟

أو تدخلي يدك في الشنطة ولوهلة تظني انك نسيتي جوالك في المكان اللي دوبك مشيتي منه؟

أو حتى فاتورة اللبس اللي تبغي تبدليه تدوريها مرة ومرتين وتلاتة الين تقريبا تفقدي الأمل انك جبتيها معاكي وبعدين تلاقيها؟

عشان تخدمك شنطتك بالطريقة الأفضل و تتجنبي المواقف اللي فاتت للأبد، لازم باستمرار تحافظي على ترتيبها ونظامها.

أهداف الأسبوع السادس عشر حتساعدك:

1- فضي شنطة يدك (وشنطك الباقية) و محفظتك من كل محتوياتها.

2- اجردي كل الفواتير وتخلصي من كل اللي ما عدتي تحتاجيها، ولمي كل الفواتير المهمة في ظرف - كرريها مرة كل شهر. (راجعي أهداف الأسبوع السابع لتفاصيل تنظيم الفواتير)

3- جمعي كل القروش والباقي من العملات الصغيرة المنثورة في أماكن مختلفة من الشنطة ورتبيها في محفظتك أو شنطة العملات الخاصة بك، اذا كانت أكثر من اللي تشيله محفظتك أو شنطة عملاتك لا تحشريها، بقيها برا في مكان معروف الين يفضى لها مجال.

4- اجردي كل البطاقات وخرجي اللي ما بتستخدميها بشكل مستمر من المحفظة، راجعي تواريخ البطاقات المهمة وقصي المنتهية وجدديها.

5- قيمي حالة شنطتك ومحفظتك الحالية وقرري اذا تحتاجي تغيريها في القريب العاجل.

6- قسمي شنطتك لمناطق:

- المكياج في شنطة صغيرة.

- أدوات الإسعافات الأولية في شنطة صغيرة ثانية.

- جوالك و منظمك مع قلم ونوتة صغيرة في مكان ثابت وسهل الوصول له.

- جمعي الأوراق المهمة اللي تحتاجيها تبقى معاكي في الشنطة خلال المشاوير القليلة القادمة و ثبتيهم مع بعض بمشبك ورق.

نصائح تساعد انه شنطتك تخدمك بشكل أفضل:

- شيلي معاكي بطاقة صراف واحدة وبطاقتين إئتمانية و رخصة قيادتك و مبلغ مالي بسيط. كل ما قلت الأغراض في الشنطة كل ما كان أسهل عليكي تتداركي الوضع لو انسرقت لا قدر الله.

- خلي دفتر صغير في الشنطة تسجلي فيه أغراض تحتاجي تشتريها، كتب ودك تقرأيها، أفلام ودك تتفرجيها و مطاعم ودك تجربيها.. الخ حيصير معاكي باستمرار مرجع بسيط يذكرك بالتناتيف اللي عادة تتنسى لمن تكوني بتقضي مشاويرك برا البيت.

- لو كنتي متوقعة تتأخري في الانتظار خلال مشوارك احرصي انك تاخدي معاكي في الشنطة حاجة تقرأيها أو تتصفحيها.

- اذا كانت شنطتك بتألم كتفك أو ظهرك وانتي شايلتها معناته انها مليانة أكثر من المطلوب، قللي من الحاجات اللي بتشيليها فيها.

- مرة في السنة (خلال رمضان فرصة جيدة) اتبرعي بالشنط اللي انتي عارفة انك ما حتستخدميها مرة ثانية.

- زي ما اتعودت الأسابيع الماضية، حألخص الأهداف بشكل مختصر و أنزلها عالانستجرام التابع للمدونة و بامكانكم تتابعوا معايا انجازي في تطبيق الأهداف عبر ستوري الانستجرام لنفس الحساب. واذا فاتتكم التطبيقات السابقة أرجعولها تلاقوها في الهايلايتس في صفحة الحساب تحت البايو.

أشوفكم على خير Xx