الترم الثالث: تححححفة!

ثلاثة أترام! دوام في رمضان!! دراسة بعد عيد الفطر!!! إجازة صيفية أقصر من المعتاد ما تبدأ إلا مع بداية ذو الحجة!!!!...... اختلافات كثيرة بين هذا العام و العام الماضي و معظمها حتحدث بشكل متتالي خلال الأشهر الأخيرة من العام الدراسي.

للأمانة، المشكلة ماهي في الوضع "الجديد"، المشكلة الكبرى تكمن في تقبلنا للوضع -لأنه جديد علينا كعائلات. والحقيقة انه معظم التغيرات اللي تم تطبيقها هذه السنة كانت ممارسات طبيعية عشناها في طفولتنا، لكن تطبيقها المفاجئ دفعة واحدة خلاها صعبة على النفس ولذلك نحتاج شوية تركيز عشان نساعد أنفسنا نتقبل ونتأقلم مع الوضع الجديد.

عشان أستعيد تركيزي، بحثت ولقيت مجموعة من النصايح واخترت منها اللي ينطبق على وضعي وظروفي وحأبدأ بتطبيقها من اليوم إن شاء الله.

نصيحة #1 رتبي حياتك الشخصية أولا

أكثر شي معبي مخك الآن بعد رجعتك من الإجازة هو شغل البيت المتراكم اللي منتظرك تعطيه وجه. الغسيل المتجمع، الأسطح المغبرة، الشنط اللي يحتاج تفضّيها، النوم المخربط، وزينة رمضان اللي لسه معلقة. أكتبي قائمة بكل المهام المنزلية اللي تحتاج منك اهتمام وبعدها ننتقل للنصيحة الثانية.

نصيحة #2 ابدأي بأبسط و أسرع مهمة على قائمة مهامك

كونك حاسة بالخمول وصعب عليكي تنتشلي نفسك من كسل ما بعد الإجازة، فمن الذكاء إنك تبدأي بالمهام السهلة بحيث تشوفي نفسك بتنجزي من قائمتك وتحسي انك ماشية في الاتجاه الصحيح. هذا الشي حيساعدك تنطلقي وتتشجعي تخلصي مهمة ورا مهمة.

حسب إحصائية أمريكية، 64% من الأشخاص في أمريكا يعانوا من اكتئاب ما بعد العطلة لأسباب مادية و صحية و عاطفية.

نصيحة #3 تخلصي من المشتتات من حولك

عادة في الإجازات يطول استخدامك لتطبيقات التواصل الإجتماعي وترجعي تمارسي هواياتك المختلفة، وتطلع ألعاب لوحية متنوعةمن مخابئها. على طاولة الطعام في بيتي الآن بقايا لعبة تركيب وعلى طاولة القهوة في الصالة خيوط التطريز الملونة ووصلت في مسلسلي الجديد للحلقة الخامسة خلال يومين. كل هذه مشتتات احتاج اني أبعدها عن نظري عشان يسهل علي التركيز في الشغلات الأهم وما يضيع الوقت. فحأرجع الألعاب للمكتبة، تطبيقات التواصل حألغي التنبيهات فيها بشكل مؤقت - وبامكانك تمسحيها و ترجعي نزليها بعد مايستقر وضعك - وهواياتي حأحصر ممارستها على غرفة الكرافت في ملحق بيتي عشان أتعنى لها لمن أبغاها مو أتهرب بيها من الشغل.

نصيحة #4 ارجعي للروتين المعتاد بأسرع وقت

مجرد ممارستك لحياتك بالطريقة اليومية اللي تعودتي عليها قبل الاجازة حيساعدك كثير إنك تعيدي ضبط جدولك وتوزيعك ليومك بدون تفكير كثير ولا تغصب. موعد استيقاظك المعتاد، الأشغال أو المشاوير الصباحية المعتادة، وقت الوجبات المعتاد، وغيره من الأنشطة والفعاليات اليومية والأسبوعية اللي حترجعك لجو ما قبل الإجازة.

نصيحة #5 كافئي نفسك على حسن أدائك!

أي مكافأة تحسيها تليق بمجهودك وبأدائك فإنتي تستاهليها، ولا تحتقري المجهود النفسي اللي بتبذليه عشان تطلعي حياتك والأشخاص اللي فيها من إحباط ما بعد الإجازة. أنا بصراحة خاطري في شنطة جديدة من فترة وهي المكافأة اللي مخططتها لنفسي بعد ما أنظم وضعي. أحس اني أستاهل، وللا ايش رايكم؟

تحمستوا كفاية وللا لسه مترددين؟

تابعوا انجازي على ستوري الانستقرام الخاص بمدونتي ma.sha.creates@ اذا تحتاجوا تشجيع وحماس اضافي وحابين تشوفوا التطبيق العملي للنصايح الخمسة اللي ذكرتها في هذا البوست. وأرسلوا لي عالخاص في الانستقرام كبداية صورة لقائمة المهام اللي حتكتبوها لنفسكم عشان يمكن تلهموني بشي يكون فاتني، أحب اني أستفيد من تجاربكم.

أشوفكم على خير Xx