كتاب : نظمي الآن! نهاية الأسبوع الثاني

كان هدفنا الأساسي في الأسبوع الثاني اننا نرتب جدولنا الشخصي عن طريق القوائم بينما كان الأسبوع الأول يركز على ترتيب الذهن.اذا ما تابعتوا معايا من البداية زوروا التدوينة الأولى في هذه السلسلة وامشوا معانا بالترتيب.

كتابة القوائم مرة ضرورية لتصفية الذهن، والنتيجة تقريبا فورية. حسيت وأنا بأكتب مهمة ورا مهمة انه الحِمل على ذاكرتي بدأ يخف لكن .... حسيت الحِمل على ضميري بدأ يزيد:

حسيت انها بدامها مكتوبة فأنا صرت ملزمة بتنفيذها في أقرب وقت. مع انه مو بالضرورة احساسي هذا في محله لأنه القوائم اللي كتبتها متفاوتة في وقتها : شي يومي وشي أسبوعي وشي مستقبلي. إني أقرر أي مهمة في أي قائمة كان أصعب شب بالنسبة لي لأني حاسة اني مضغوطة في وقتي في لفترة الحالية. فكتبت معظم بنودي في قائمة المهام المستقبلية وحأخد منها شوية شوية وأضيفها للقوائم اليومية والأسبوعية حسب ما جدولي يسمح:

كمان قررت اني حأخطط جدولي بالتفصيل بس في الفترة اللي أقدر اتحكم فيها أكثر شي في وقتي: وهي فترة ما بناتي في المدرسة. لأنه بس يرجعوا الله يحميهم وقتي كله بين مذاكرة وطبخ ومتابعة وتنويم وبنهاية هذه الفترة غالبا تكون طاقتي انتهت. وبرضه لهذا السبب خططت فترة راحتي اليومية انها تكون بعد نوم البنات بحيث اذا كان عندي طاقة وإرادة اني اكمل القائمة اليومية حقتي يصير أكملها وقتها وأرتاح الى ثاني يوم.

أما باقي الأهداف حقت الأسبوع الثاني فهي متضمنة في كتابتي للقوائم: ترتيب المهمات حسب أولويتها كان سهل في المهمات اليومية والأسبوعية لكن ماهو بنفس السهولة في المهمات المستقبلية، خاصة انه بعضها أنا كاتبته بشكله المعقد ويبغالي أحلله لمهمات أصغر حتى أقدر أدخلها في جدولي اليومي.

هذا اللي كان تطبيقي لأهداف الأسبوع الثاني، بعد ساعة ساعتين ان شاء الله أنزل أهداف الأسبوع الثالث.. انتظروني وأشوفكم على خير Xx

#نظميالآن #اسلوبحياة #ترتيب #تنظيم #تحدي #كتابمترجم