كتاب: نظمي الآن! نهاية الأسبوع الثالث

لازلت ماشية أسبوع بأسبوع ووصلت لنهاية الأسبوع الثالث، اللي فاتها الأسبوع الأول (تنظيم الذهن) والتاني (تنظيم الجدول الشخصي) تخطف رجلها تقرأهم وترجع بعدين تكمل في دي الصفحة. أهداف الاسبوع هذا كانت متعلقة بتنظيم جدول التنظيف وهذا جانب شبعت قراءة عنه في الكتب ومواقع التواصل والمدونات.

لو في شي واحد اتعلمته منهم كلهم هو انه كل شخص عنده طريقة خاصة ومختلفة ومافي طريقة وحدة بس هي الصحيحة لكن كلهم يتفقوا انه الشغل أول بأول يساعد على الاستمرار. ومع اني اعرف انه الشي دا صحيح الا اني كنت أستسلم للتعب والارهاق اللي آخر اليوم وأطلع أنام والدنيا منكوتة.

الأسبوع الثالث كان في هدف من الأهداف يتكلم بالتحديد عن ترتيب ما قبل النوم وكيف انه الأسرة كلها المفروض تشارك فيه وهذا الشي حمسني اني أجرب ترتيب الصالة فقط كل يوم قبل لا أنام - أجرب نفسي في الالتزام ومستوى طاقتي بعد ما يناموا البنات - وبدأت بالصالة لحالها لأني أعرف لو حملت نفسي فوق طاقتي من البداية حأبطل من الموضوع كله.

استمريت طول الأسبوع على هذا الحال: أيام أحس الموضوع سهل وبسيط وعندي طاقة وأيام أغصب نفسي بالقوة عليه. فاكتشفت علاقة مباشرة بين الصالة المرتبة ومعنوياتي الصباحية، الصالة المرتبة بدون ما أفكر في الموضوع تخليني مسترخية ومتشجعة أبدأ في مهمات اليوم. في المقابل يوم ما نمت بدون ما أرتب الصالة صحيت وأنا شايلة هم الترتيب من صباح رب العالمين، مع انه ما كان هذا احساسي في الأيام التانية تجاه باقي شغل البيت. حسيتها زي قدر السليق كيف لو غسلته أول ما حطيته في الحوض مقابل لو قعد كم ساعة ونشف: قد ايش يفرق الوقت والجهد بين الحالتين؟

أهم تطبيقاتي لهذا الأسبوع كان جدول المهام اليومية للبنات:

الجدول العادي المكتوب حينفع مع عائلة أعمارهم أكبر من بناتي (11-7سنوات) لكن هذا كان من الأفكار اللي من زمان شفتها في بنتريست و كان نفسي أسويها في بيتي.

حاولت انه المهمات اللي احطها في جدول كل منهم تكون مناسبة لعمرها، كمثال سارة عمرها 11 سنة فكان غسيل المواعين من نصيبها - مواعين بسيطة طبعا ومافيها سكاكين ولا قدور ثقيلة - وسها عمرها 7 سنوات فتفريغ غسالة الصحون النظيفة أنسب لها.

على فكرة اللي تحب تجرب يدها في جدول مماثل نزلت طريقة عمل الجدول في تدوينة منفصلة، بالامكان الإطلاع عليها هنا.

كمان اشتريت 3 سلال غسيل من ايكيا تدخل وسط بعض عشان ما تاخد مساحة:

بحيث أقسم لهم غسيلهم المنظيف المطبق وأوزعه على السلال وكل وحدة منهم تاخد غسيلها ترصه في ادراجها يوم ما تكون دي الشغلة موجودة في جداولهم.

وحدة من النصايح اللي اقترحتها المؤلفة الاسبوع الماضي هي انه نجمع الشغلات ونسويها بالجملة، قد تكون هذه النصيحة مفيدة للعائلات الصغيرة لكن أنا أم لثلاثة أطفال ومعايا أنا وأبوهم صرنا خمسة ماشاء الله. ما في مجال لتجميع الشغلات: اللي يتجمع يتراكم ويخرج عن السيطرة عشان كده من لمن قرأت النصيحة وأنا مبيتة النية اني أطنشها. الشي اللي جربته من قبل الكتاب وما ناسبني ما حأضيع وقتي فيه.

هذا السبب اللي خلاني أجدول يومي بحيث يتضمن غسلة واحدة: أحطها في الغسالة أول ما أصحى الصباح وعالظهر وقت غفوة بنتي الصغيرة أطلعها وأطبقها وأوزعها على السلال حقت البنات. وعشان كده وحدة من أهم الاساليب اللي أحاول أتبعها في حياتي هي Clean as you go ومعناها انه التنظيف والترتيب يصير خلال الشغلة اللي بتسبب الفوضى، طبخ أو عمل فني أو حتى تجليد كتب. أخلي جنبي كيس فاضي أرمي فيه المخلفات أول بأول والأشياء اللي أخرجها من مكانها واستخدمها أرجعها مكانها في لحظة ما أخلص منها وكده.

هذه تطبيقاتي لأهداف الأسبوع الثالث.. انتو ايش سويتوا؟ كيف طبقتوا أهداف الأسبوع الثالث؟ أذا تحبوا تصوروا وتوروني حطوا صور تطبيقاتكم عالانستجرام واستخدموا الهاش تاق #أنا_منظمة عشان أشوف تطبيقاتكم .. واذا حساباتكم خاصة ارسلوا لي تطبيقاتكم عالخاص على حساب انستجرامي التابع للمدونة Ladyhblog..

أشوفكم على خير Xx

#نظميالآن #اسلوبحياة #تنظيم #ترتيب #كتابمترجم #تحدي