كتاب: نظمي الآن! نهاية الأسبوع الأول

انتهى الأسبوع الأول! ما عمره خطر على بالي انه أصعب شي ممكن ألتزم بيه هو النوم ٧ ساعات.

طبعا اللي تبغى تعرف الهرجة من بدايتها تتفضل على التدوينة الأولى في هذه السلسلة وبعدين تكمل قراءة في دي التدوينة. أهداف الاسبوع الأول كانت بالعموم سهلة وقدرت اني أطبقها بشكل بسيط وحسيت اني بدأت ارتب أفكاري ومهماتي بشكل أفضل.

خصصت مذكرة صرت أكتب فيها كل شي، ما أقصد الفضفضة، قصدي قوائم الشغلات اليومية و ترتيبات الضيوف و متتبع المعنويات وتخطيطات السفر وأي شي يحتاج له تسجيل. وطبعا اذا حبيت اني أكتب فيه زي المذكرة العادية يوميات وماشابه ممكن برضه. أهم شي في المذكرة عشان تنجح وما تضيع الحاجات انه كل ما أكتب صفحة أرقمها و أسجلها في الصفحة الأولى اللي خصصتها كفهرس لباقي الصفحات:

متتبع المعنويات كان تطبيقي للهدف حق الانتباه لكل الحاجات اللي تأثر على نفسيتي وبالتالي على انجازي وأدائي اليومي، الجدول ببساطة فكرته انه عندي تدرج لوني من الاخضر اللي يمثل ارتفاع المعنويات للأحمر اللي يمثل انخفاضها و كل الالوان اللي بينهم ، مع امكانية اني أكتب السبب في الفراغ من كل خانة:

تطبيقي لهدف اني أكتب أهدافي في المستقبل القريب وتقسيم الهدف الى مهام ابسط تساعدني على تحقيقه كان لزيارة صاحباتي لي الأسبوع الماضي، الطريقة هذه باذن الله حأعتمدها من الآن لأني حسيت انه ذهني صافي واعصابي مسترخية و فعلا استمتعت بالتخطيط و بالاستعداد و بالضيوف أكثر من المعتاد:

في نهاية الاسبوع الاول حسيت انه الشي الوحيد اللي ما قدرت التزم بيه هو النوم ٧ ساعات وشفت الفرق في نشاطي بين الايام اللي نمت فيها ٤ ساعات واللي نمت فيها ٦ ساعات فأحاول أخلي النوم الكافي أولوية في حياتي.

بكرة ال باذن الله أنزل أهداف الاسبوع الثاني .. اذا تابعتوا معانا من الاسبوع الماضي لا تفوتكم واذا هذا أول موضوع تقرأوه و ودكم تتابعوا معانا ابدأوا من الاسبوع الاول وادخلوا المدونة نهايات الاسابيع وقارنوا تطبيقي بتطبيقكم واذا عندكم أفكار تحبوا تشاركوني بيها اكتبوها في تعليق

بالتوفيق وأشوفكم على خير Xx

#نظميالآن #اسلوبحياة #ترتيب #تنظيم #تحدي #كتابمترجم