كتاب: نظمي الآن! الاسبوع الاول

عالانستجرام اليوم تكلمت عن كتاب اشتريته قبل فترة: عنوانه organize now! بمعنى نظمي الان وطريقته انه يحدد اهداف اسبوعية تاخدك بالتدريج في رحلة لتنظيم الذات والحياة. طبعا الحمدلله الكتاب له كم شهر على الرف، هههههه

اليوم لمحته وحسيت بالخجل من نفسي اني ركنته بالطريقة دي فقررت اني ابدأ فورا وقلت اسأل عالانستجرام اذا احد يحب يشاركني التجربة بتطبيق الاهداف الاسبوعية وتوثيق التقدم خلالها، مع اني مرة حأنبسط لو احد بدأ معايا الا اني حاسة بحجم الارتباط واتوقع انه ما حيكون الانتظام سهل. لكن برضه انا حأستمر ان شاء الله وحاستخدم المدونة مع حساب الانسجرام بحيث انزل الاهداف الاسبوعية واسجل تقدمي الاسبوعي وملاحظاتي.

لو كنتي من اللي حيشاركوني التحدي فبالتوفيق ولو كنتي بس شدك الموضوع وحابة تتابعي تقدمي فالله يحييك.

في البداية شرحت الكاتبة انه اول خطوة في تنظيم الحياة هي ترتيب الافكار والفوضى الذهنية، وانه اذا تبغي تنجزي أكثر لازم تكون افكارك مرتبة لانه الصفاء الذهني يأثر على احاسيسك ومدى رضاءك عن نفسك وعلى هذا الاساس كانت أهداف الاسبوع الاول هي كالتالي:

1- نامي ٧ ساعات على الاقل في اليوم. كل ما ارتحتي بالشكل الكافي خلال الليل كل ما كان انجازك خلال اليوم افضل وكل ما كان ذهنك اصفى واحساسك بالضغط يخف بسبب انك بتعطي جسمك حقه من الراحة.

2- ابدأي يومك بكتابة قائمة قصيرة بكل الاشياء اللي تحتاجي تسويها هذاك اليوم: لمن تكون مكتوبة ما يحتاج كل شوية تحاولي تتذكري ايش باقي لك اشغال.

3- خصصي لنفسك مذكرة لكتابة احداث حياتك فيهاوالمواقف اللي تمري بيها، مولازم تكتبي فيها بشكل يومي بس خليها موجودة للأيام اللي تحسي نفسك تبغي تكتبي فيها.

4- قللي وقت الجلوس على التلفزيون

5- خصصي لنفسك فترات راحة مدتها دقيقتين ثلاثة دقايق مرتين الى ثلاث مرات في اليوم: خلالها توقفي اللي في يدك تماما وتسترخي وتاخذي لك نفس.

6- خصصي لنفسك وقت للرياضة اليومية: روحي النادي، دوري بالدراجة في الحوش، امشي حولين البيت مع اطفال، اطلعي وانزلي في الدرج.. اي نوع من انواع الحركة حيفيدك.

7- حددي اهدافك في المستقبل القريب واكتبي لنفسك قائمة المهام اللي تحتاجي تسويها عشان تحققي اهدافك.

8- بسطي حياتك بانك تقللي من تعريض نفسك للصور والاخبار السلبية فيالاخبار والجرايد والدعايات وحتى الكتب والافلام العنيفة أو الحزينة.

هذه كانت الاهداف الاسبوع الاول: يوم الجمعة أو السبت الجاي ان شاء الله حابلغكم كيف كان التزامي بها وكيف طريقتي في تطبيقها، اللي تحب منكم تشاركني ممكن تتفاعل معايا عالانستجرام بتصوير اللي ممكن يتصور من الانجازات واستخدام هاش تاق #انا_منظمة وتمنشني على الصورة يصير نشجع بعض.

يوم الاحد الجاي باذن الله حأنزل اهداف الاسبوع الثاني وحأعطيكم خبر اني نزلتها كموضوع في المدونة عن طريق الانستجرام.

بالتوفيق للجميع وأشوفكم على خير Xx

#تنظيم #ترتيب #اسلوبحياة #تحدي #نظميالآن #كتابمترجم