كتاب: نظمي الآن! الأسبوع الرابع عشر

متخيلين انه لنا أكثر من ثلاثة أشهر في هذا التحدي! عشان أكون صريحة، لو ماكنتوا معايا ما كنت استمريت الى الآن، بسهولة الوحدة فينا تنشغل بأي شي يقابلها في الحياة بالذات اذا الشي اللي بتحاول تركز عليه بيستهلك وقت وجهد مو بسيط.

وصلنا للأسبوع الرابع عشر: تنظيم أدوات الأعمال الفنية. اذا كان هذا الموضوع هو أول موضوع تقرأيه من سلسلة "كتاب: نظمي الآن!" وشدتك الفكرة و وحابة تبدأي من البداية، تفضلي على صفحة نظمي الآن وحتلاقي كل الموضوعات السابقة مرتبة من أحدث للأقدم. نصيحة مني: اذا ما كانت ارادتك أضعف مما تتمني - نفس حالتي - حاولي تقنعي أحد يلتزم معاكي بالتحدي لأنكم حتحتاجوا تتنافسوا وتشجعوا بعض عشان تقدروا تستمروا.

الأعمال اليدوية هي وسيلة كل انسان لاظهار الجانب الفني في شخصيته، ويفترض انها تكون ممتعة ومهدئة للأعصاب. عشان يتحقق هذا الغرض لازم تكون أدواتك مرتبة ومنظمة وكل غرض في مكانه عشان لا يضيع وقتك وجهدك وانتي بتدوري عليها.

قبل لا تبدأي في أهداف هذا الأسبوع اسألي نفسك: هل انتي من الأشخاص اللي فعلا يستمتعوا بالمشاريع الفنية، وللا بس عاجبتك فكرة انك يكون عندك اهتمام بالاشغال اليدوية؟ هل عندك نية حقيقية انك تكملي بعض المشاريع اللي بدأتيها ووقفتي قبل لا تخلصيها؟ واقعيا، هل كل مشروع تبدأيه عندك وقت في جدولك انك تخلصيه؟ هل تمضيتك وقت في الأعمال الفنية فعلا يسعدك وللا يزيد ضغط عليكي وبنود في قائمة المهام حقتك؟... اذا تحبي الأعمال الفنية استمري فيها، واذا ما تحبيها اعطي نفسك الحرية انك توجهي طاقتك وتسخري وقتك لحاجة تانية تهمك أكثر منها.

أهداف هذا الأسبوع:

1. جمعي كل أدوات ومواد الأعمال الفنية من كل مكان في البيت.

2. ارمي فورا:

• المقصات المتلمة.

• الاقلام والألوان الجافة.

• قصاصات الأقمشة والأوراق الصغيرة.

• أدوات الفنية اللي ما استخدمتيها خلال الستنين الماضية.

• أدوات الفنية اللي ماهي عاجبتك، لأنها لو ماهي عاجبتك ما حتستخدميها.

1. قسمي الأدوات الباقية حسب الصنف: الحياكة، الأختام، صنع الكروت، الخياطة،.. الخ

2. قرري ايت علب حتخزني فيها كل صنف، وخزني الأدوات المتشابهة مع بعض: أقمشة، فراشي، ستيكرات، أوراق. واكتبي على العلب من برا ايش محتوياتها.

3. حددي مكان تحتفظي فيه بعلب الأدوات الفنية. اذا عندك مجال في بيتك، احتفظي بيهم كلهم في مكان واحد وخصصي الغرفة للأعمال الفنية. اذا بيتك ما يسمح بغرفة خاصة لها، اختاري الغرفة اللي حتشتغلي فيها بالأدوات الفنية حقتك وخزنيها هناك.

4. اشتري علب شفافة كبيرة تحتفظي فيها بالمشاريع اللي بتشتغلي فيها حاليا، حطي في العلبة كل الأدوات والمواد اللي تحتاجيها خلال مشروعك الحالي ولمن تنتهي منه فورا رجعي الباقي من الأدوات والمواد لأماكنها السابقة.

5. خصصي سلة لأدوات الخياطة الأساسية: الخيوط، الإبر، الدبابيس، المتر، أزارير، مخدة دبابيس ومقص.

نصائح هذا الأسبوع:

• اذا كان عندك خزانة اضافية في البيت استخدميها لتخزين أدواتك.

• اشتري أدوات اضافية بحيث يكون عندك مثلا مقص مع أدوات الفنون الورقية ومقص مع أدوات الحياكة ومقص مع الأقمشة.

• قوارير أكل البيبي الفاضية مقاسها مناسب للاحتفاظ بالقطع الصغيرة.

• قبل ما تبدأي مشروع فني جديد، قرري ايش الهدف منه، هل حتهديه وللا حتبيعيه وللا حتحتفظي بيه؟ القرار المبكر حيخدم غرضين: حيضمن لك انه المشروع النهائي ما حيتركن على جنب للأبد و حيعطيكي دافع انك تنهي المشروع أسرع وبحماس أكبر.

• حدي نفسك في عدد المشاريع اللي بتشتغلي عليها في وقت واحد بانك تحدي نفسك بكم علبة شفافة للمشاريع الحالية حتسمحي لنفسك تشتريها. اذا تقدري تشتغلي على 3 مشاريع في نفس الوقت فبامكانك تشتري 3 علب شفافة لتخزين المشاريع الحالية. واذا ما تقدري تشتغلي الا على مشروع واحد فلا تسمحي لنفسك تشتري إلا علبة شفافة واحدة.

• شجعي أطفالك على التعبير عن انفسهم من خلال أعمالهم الفنية بانك تعطيهم بواقي المواد و الأدوات اللي انتهيتي منها وتناسب سنهم.

• مرة في السنة شيكي على أدواتك واتخلصي من أي أدوات خربانة: أقلام منتهية وصمغ ناشف ومقصات ومشارط متلمة.

• اذا مرت سنة كاملة على مشروع وما اشتغلتي عليه، فالأرجح انك ما حتشتغلي عليه واتخلصي منه.

وبس والله!

انتو لو تشوفوا غرفة مكتبي اللي أنا محتفظة فيها بأدواتي حتحمدوا ربكم انكم منتو مكاني. زي ما سويت الأسابيع الماضية حأنزل قائمة مهام الأسبوع على حساب الانستجرام التابع للمدونة، وحأصور لكم تطبيقي للأهداف خطوة خطوة وارفعه على ستوري الانستجرام. برضه في صفحة حسابي حتلاقوا تطبيقات هذا الأسبوع والأسابيع السابقة ضمن الهايلايتز تحت البايو. بالتوفيق لي ولكم جميعا.

أشوفكم على خير Xx

#نظميالآن #كتابمترجم #تحدي #ترتيب #تنظيم #اسلوبحياة #أشغاليدوية