كتاب: نظمي الآن! الأسبوع الرابع

الاسبوع الرابع!! بعد ما اتطرقت المؤلفة في الأسابيع الماضية لثلاثة من جوانب تنظيم الذات: تنظيم الذهن، تنظيم الجدول الشخصي، وتنظيم جدول التنظيف وصلنا لختام أسابيع تنظيم الذات.

أهداف الأسبوع الرابع تتعلق بترتيب الأولويات، لمن يطير اليوم وانا من شغلة لشغلة بدون ما أخلص ولا وحدة من الشغلات اللي بدأت فيها. وللا لمن يكونوا جايين ضيوف و الين اخر لحظة وأنا أجري من مكان لمكان في البيت وبعد ما يوصلوا بالي يكون مشتت وكل ما قدمت جزء من الضيافة يكون بالي في الجزء اللي بعده ويخرجوا الضيوف و أنا مرهقة وورايا شغل كتير........

أهداف الأسبوع الرابع هي كالتالي:

1- اسألي نفسك: ايش المهم بالنسبة لي؟ ايش يحمسني؟ ايش الانجازات اللي أبغى احققها؟ لو كنت أقدر أشتغل أي وظيفة في حياتي، ايش أحب أسوي؟

2- أكتبي قائمة بأهم 10 أولويات في حياتك، أولوياتك لازم تعكس الحاجات المهمة لك انتي. لو ماحددتي لنفسك بوضوح الحاجات اللي تهمك انتي، حتلاقي الناس والظروف اللي حولك حتجبرك على أولويات مختلفة. حطي قائمتك في مكان تشوفيها فيه باستمرار، على كمودينتك، عالثلاجة، مكتبك أو حتى مذكرتك.

3- أكتبي قائمة بكل الأنشطة والمهام الشخصية والاجتماعية والوظيفية اللي انتي حاليا بتسويها، وقارنيها بقائمة أولوياتك العشرة وقرري ايش من قائمة المهام ممكن يتهمش أو يتلغي عشان يترك لك مجال في وقتك وجهدك للعشرة المهمين. ركزي على الغاء المهام اللي تاكل وقتك بدون ما تحسسك بالرضا الداخلي.

4- الآن في هذه اللحظة، حددي في منظمك أوقات خلال الأسبوع هذا والشهر هذا تسوي فيها حاجات تخدم أولوياتك، مثلا:

- مكالمة هاتفية لصحبتك اللي من زمان ما كلمتيها.

- جمعة عشا مع العائلة.

- ليلة تتفرجي فيها فيلم أو تلعبي لعبة جماعية مع عائلتك.

- وقت للرياضة.

- خرجة عشا رومنسية مع شريك حياتك (بدون الأطفال اذا ممكن)

- وقت لقراءة كتاب مسلي.

- وقت تقرأي فيه لأطفالك قصة.

- وقت للمشاريع الفنية والأعمال اليدوية.

5- اتعلمي اسلوب الرفض القاطع بأدب. حطي لنفسك حدود ما تتجاوزيها في الضغط على نفسك لخدمة الأخرين وتحمل أعباء أشغالهم اللي المفروض يسووها بنفسهم.

6- لا تستهيني بأولوياتك أبدأ.

7- أكتبي قائمة بالأشياء اللي مالها تكلفة مادية تذكر وممكن تسويها مع عائلتك وحاولي يكون أسبوعك فيه أكتر من بند من هذه القائمة.

8- لمن تشتري المنظم السنوي الجديد احرصي انك تجدولي أولوياتك قبل أي شي ثاني.

أحس هذه الأهداف على بساطتها فهي الأصعب على النفس، بالذات اللي تكون همشت أولوياتها سنين متتالية، حتحس بالذنب والتقصير مع اللي حولها لمن تبدأ تفكر في نفسها. محد بيقول قصري في الضروريات، بس حاولي تميزي بين واجباتك وبين جمايلك على الناس وبين الحاجات اللي بتجبري نفسك عليها بدون ما يكون في أي شي يلزمك بيها.

                      أشوفكم على خير Xx

#ترتيب #تنظيم #تحدي #كتابمترجم #اسلوبحياة #نظميالآن