كتاب: نظمي الآن! الأسبوع الحادي عشر

ما تتخيلوا احساسي بالإنجاز لمن استوعبت إني لازلت مستمرة بعد ١٠ أسابيع من الأهداف والترتيب والتنظيم اللي شمل جوانب مختلفة من حياتي، اذا كانت هذه أول تدوينة تقرأوها من سلسلة "كتاب: نظمي الآن!" وجذبك الموضوع زوري صفحة نظمي الآن وحتلاقي كل المواضيع السابقة من الأحدث الى الأقدم.

الأسبوع هذا حيختص بتنظيم الإيميل الخارج عن السيطرة ... سبحان الله لسه قبل يومين فتحت تطبيق الإيميل في جوالي واستقبلني دا الرقم اللطيف:

كان الإيميل -أول ما بدأ- مرة مسلي ومفيد وممتع، بس البشر ما يسيبوا شي الا و يستخدموه عشان يدخل لهم فلوس بكل الطرق الصحيحة والملتوية، هذا بالاضافة لكل المواقع اللي تطلب إيميلك وتبدأ ترسل لك نشرات أسبوعية وشهرية بمنتجاتهم أو بآخر المقالات المنشورة عندهم. فصار محتوى صندوق الوارد بنسبة 90 في المية عبارة عن زبالة، واذا ما رميتيها أول بأول حتتراكم وتتراكم وتتراكم وما تصحي على نفسك إلا وعندك 27000 إيميل غير مقروء.

أهداف هذا الأسبوع هي:

1. مري على كل الإيميلات المقروءة وامسحي كل الايميلات اللي ما تحتاجيها، حتى اللي فيها ملفات مرفقة حفظتيها على جهازك.

2. امسحي كل الإيميلات المرسلة اللي ما تحتاجي يكون عندك نسخة منها.

3. انشئي ملفات في الإيميل لتصنيف الرسائل حسب الموضوع، المرسل،.. الخ. هذه الطريقة حتفضي لك ملف صندوق الوارد وحتسهل لك البحث عن الإيميلات في المرات القادمة، ضروري تنشئي ملف باسم "للحفظ" تحطي فيه الإيميلات اللي فيها ملفات مرفقة تبغي تحفظيها على جهازك وملف باسم "قائمة المهام" للإيميلات اللي يترتب عليها إضافة مهمة لقائمة المهام حقتك.

4. الغي اشتراكك في كل قوائم الإيميلات اللي ما تحتاجيها أو صرتي ما بتقرأيها، معظم الإيميلات هذه يكون فيها رابط لإلغاء الاشتراك "unsubscribe" اضغطي عليه واتبعي التعليمات المطلوبة حتى تمسحي إيميلك من قائمتهم.

5. فعلي خاصية البريفيو "preview" اللي تسمح بظهور جزء من النص اللي في الايميل، وبذلك بدون ما تفتحي الرسالة يبان اذا تحتاجي تقرأي الإيميل وللا لأ.

6. حاولي يكون عندك عنوان إيميل واحد لكل رسايلك الشخصية، مع سهولة تكوين أكثر من عنوان بريد إلكتروني لنفس الشخص إلا ان لوقت المستغرق في التنقل بين صناديق البريد والمرور على كل الإيميلات اللي تستحق أو لا تستحق القراءة حيتضاعف بعدد الصناديق.

7. حدثي قائمة عناوين إيميلات العائلة و الأصدقاء والعمل بحيث تكون دائما صحيحة.

8. أي إيميل يوصلك لصندوق الوارد وتكتشفي انه سبام اتأكدي انك ترسليه لملف السبام عشان لا عاد يوصلك منه مرة تانية.

نصايح متعلقة بأهداف الأسبوع:

• لا تستخدمي صندوق الوارد للاحتفاظ بالرسايل، أي رسالة تبغي تحتفظي بها حطيها في ملف خاص بها وباللي يشبهها من الرسايل.

• اذا انطلب منك إيميلك للتسجيل في أي خدمة أو موقع، دوري على خيار انه مايوصلك منهم إيميلات واختاريه بحيث تقللي من الإيميلات اللي بتوصلك على ايميلك و انتي ما تحتاجيها.

• اذا وصلك أيميل تحتاجي تردي عليه وما عندك وقت في لحظتها بامكانك تضغطي على زر "reply" وبعدين تخرجي من الرسالة وتحفظيه في ملف المسودات "Drafts" .

زي ما سويت الأسبوع الماضي حأنزل اليوم عالانستجرام قائمة مهام مختصرة لأهداف الأسبوع الحادي عشر، وحأنزل تطبيقي للأهداف على ستوري الانستجرام وحأحتفظ بيه ضمن الهايلاتس تحت البايو في صفحة حسابي.

أشوفكم على خيرXx

#تنظيم #تحدي #اسلوبحياة #نظميالآن #كتابمترجم #ترتيب