كتاب: نظمي الآن! الأسبوع الثاني

بدأت باستخدام كتاب نظمي الآن! و قررت اني اترجم الاهداف الاسبوعية اللي محددتها المؤلفة وانزلها في تدوينة يوم الأحد من كل أسبوع. تدوينة الأسبوع الأول نزلتها الأسبوع الماضي وفيها تفاصيل بداية الكتاب والأهداف المتعلقة بتنظيم الذهن.

الأسبوع الثاني من التحدي يستهدف تنظيم الجدول الشخصي. تكملة لموضوع تنظيم الذهن وان المهمات اللي ما بأنجزها تفضل شاغلة ذهني وتستهلك جزء من طاقتي،  كانت المؤلفة بتقول اذا نظمت جدولي حأقضي معظم يومي وأنا عارفة بالضبط ايش احتاج أسوي وأخلص أشغالي أول بأول. قائمة مهام واضحة ومفصلة حتساعدني أتذكر الحاجات اللي أبغى أنجزها بدل ما يشرد ذهني ويضيع وقتي، لكنها بنتصح انه التخطيط يكون لثمانين في المية من الشغلات اللي احس انه الوقت يسمح بيها عشان لو طرأ أي شي خلال اليوم ما يأثر على الحاجات المجدولة مسبقا.

أهداف الأسبوع الثاني هي كالتالي:

1- أستخدم منظم يومي واحد أجدول فيه كل جوانب حياتي حتى لا يتعارض مجلس الأمهات مثلا مع طلعة الفطور مع الصاحبات.

2- أجلس مع العائلة مرة في الأسبوع/الشهر عشان نتقاسم المهمات ونخطط الوجبات ونرتب الارتباطات حسب جداولهم المنفردة (اختبارات، دعوات عشاء، ضيوف)

3- أجمع المهمات المكتوبة على قصاصات الأوراق وفي دفاتر الملاحظات وفي النوتة الصغيرة اللي في الشنطة و في الأوراق اللي بترسلها المدرسة واللي شاغلة ذهني وأكتبها كلها في مكان واحد من المنظم، وأحدثها باستمرار.

4- أقسم قائمة المهام حسب الأولوية: 

أ: مهمات لازم تنجز اليوم (مثلا: أغير شراشف سرر البنات، أفضي الثلاجة من البواقي) هذه تكتب في صفحة اليوم من المنظم.

ب: مهمات لازم تنجز هذا الأسبوع (مثلا:أمسح محتويات الآيباد القديم لتحضيره للبيع، أنزل تدوينة وصفة التشيز كيك) هذه تتوزع على أيام الأسبوع اللي أختارها وتكتب في المنظم.

ج: مهمات أبغى أنجزها في المستقبل (مثلا: أعزم الجارات، أخرج أفطر مع أختي) وهذه أخصص لها صفحة لحالها في المنظم وأختار وحدة منها كل شهر واحدد يوم أسويها فيه. والصفحة دي ممكن تشمل قائمة بالأشخاص اللي ابغى أشتريلهم هدايا، كتب أبغى أقرأها، أفلام نفسي أشوفها، حتى ممكن أكتب فيها حاجات استلفتها وأبغى أرجعها لأصحابها.

5- أرقم المهمات حسب أهمية انجازها. اذا خلصت كل المهمات اللي حددتها لنفسي اليوم ولازال عندي وقت وجهد كافي ممكن أبدأ بأهم مهمة في القائمة الأسبوعية أو حتى الشهرية. اذا ما مداني أخلص مهمات اليوم تصير المهمات الباقية هي الأولى في مهمات اليوم اللي بعده.

6- أحجز مواعيد المستشفى الدورية وطبيب الاسنان والتطعيمات لجميع افراد العائلة للمدة سنة قدام. وأحاول أخليها ورا بعض في نفس اليوم بحيث نخلص أكثر من موعد في زيارة واحدة للمستشفى.

7- أحط دفتر صغير جنب راسي عالكمودينة وأكتب فيه أي شي يخطر على بالي بعد ما أنسدح للنوم. بالطريقة هذه ما أنسى شي وأنام وأنا بالي مرتاح وأضيفها للمنظم في الصباح.

8- أجدول أوقات للراحة، بحيث أقضيها وأنا عارفة انه جدولي ماشي مزبوط وما حأتأخر في انجاز مهماتي.

نصائح أمشي عليها وأنا بأطبق أهداف الأسبوع الثاني:

- أكون واقعية في تقدير عدد المهمات اللي اقدر انجزها في يوم واحد

- أحاول قد ما أقدر احدد موعد بداية ونهاية للاجتماعات والزيارات ومجالس الأمهات وحتى رحلات المطاعم والأسواق.

- أخطط جدولي بالاعتماد على المكان عشان انجز الشغلات القريبة من بعض مع بعض ولا أقضي اليوم في التنقلات: والشي دا ينطبق على جوا وبرا البيت.

- اجدول مواعيدي أبكر ما يمكن خلال اليوم: موعد مستشفى ـ زيارة صيانة - توصيل مقاضي.. الخ لأنها عرضة بشكل كبير للتأخير كل ما زادوا الاشخاص اللي مواعيدهم قبلي. 

- دائما أقسم المهمات الكبيرة لشغلات أصغر منها وأوزعها على ايام متعددة عشان تسهل علي، مثال: بدل ما أكتب "أستعد لضيوف الخميس" أفصلها بحيث أكتب "أنظف غرفة الضيوف" + "أطلب كيكة الليمون" + "أمر على السوبر ماركت عشان مقاضي الضيوف" + "أفضي الأسطح من الكراكيب اللي تجمعت عليها خلال الأسبوع" + .... الخ وفي النهاية لازم أحدد لنفسي وقت نهائي للشغل مثلا الأربعاء المسا وأوزع باقي الشغلات شغلة شغلتين في اليوم من اليوم الى الوقت النهائي اللي حددته.

وبس والله!! الكلام مرة كثير بس مليان أمثلة وماهو بالصعوبة اللي تتخيلوها .. انتو ابدأوا حبة حبة وحتتفاجأوا انه بنهاية الأسبوع عندكم قائمة مهام متكاملة، عن نفسي مرة متحمسة ومتخوفة من طول قائمة المهام اللي حأكتبها لكن متشوقة لاحساس السلام الداخلي اللي أتمنى أحس بيه بعد ما أفرغ كل المهمات اللي في بالي

شدوا حيلكم وبالتوفيق جميعا.. أشوفكم على خيرXx

#نظميالآن #اسلوبحياة #ترتيب #تنظيم #تحدي #كتابمترجم