كتاب: نظمي الآن! الأسبوع الثالث عشر

لا تظني انه فاتك الأسبوع الثاني عشر، باختصار: الأسبوع الثاني عشر كان يتعلق بتنظيم البريد، وبحكم اني في السعودية وما اتعنون بيتي إلا مؤخرا ولازال ما بيوصلني على عنواني البريدي شي فقررت اني أتخطى الأسبوع الثاني عشر للأسبوع اللي بعده اللي هو الأسبوع الثالث عشر.

هذا الأسبوع يركز على تنظيم ألعاب الأطفال. في رأي المؤلفة: فكرة تخصيص غرفة ألعاب للأطفال هي فكرة فاشلة لأكثر من سبب، واحد انه الغرفة حتتحول لمزبلة للألعاب والفوضى، واتنين حتعلم الأطفال فكرة التخزين اللامنطقي والاحتفاظ حتى بالاشياء اللي ما نحتاجها ولا نستخدمها.

إذا كان هذا أول موضوع يمر عليكي من مواضيع سلسلة "نظمي الأن!" و جذبتك الفكرة والتحدي، انصحك بزيارة صفحة نظمي الآن وحتلاقي كل المواضيع ذات الصلة مرتبة من الأحدث للأقدم وبامكانك تطلعي على كل الأسابيع السابقة.

طبعا قد يكون في سبب يدفعك لتخصيص غرفة للألعاب، على سبيل المثال لو غرفة نوم أطفالك مرة صغيرة مافيها مكان لللعب ولا تتحمل أي تخزين أو لو كانت غرفة نوم أطفالك في الدور العلوي و أطفالك صغار تحتاجي تشرفي عليهم خلال ما بيلعبوا. لكن في أغلب الأحيان، استخدام غرفة للألعاب بيحرمك من استخدامها بطريقة أفضل كغرفة أنشطة لكل العائلة على سبيل المثال.

في طريقتين لتطبيق أهداف هذا الأسبوع: إما بتجميع كل الألعاب الموجودة في البيت في غرفة وحدة وتنقيحها وترتيبها هناك؛ أو بالتنقل من غرفة الى غرفة و استبعاد الألعاب اللي حترميها أو تتصدقي بيها قبل ما تبدأي ترتيب الباقي.

أهداف هذا الأسبوع:

1. تكلمي مع أطفالك عن أهمية العطاء ومساعدة المحتاجين، واطلبي منهم مرة في السنة -نهاية رمضان مثلا- انهم يختاروا مجموعة من ألعابهم عشان يتبرعوا بيها للأطفال اللي ماعندهم ألعاب. بامكانك تشجعيهم بانك تحسبي لكل واحد منهم 5 نقاط عن كل لعبة يتبرع بيها واذا وصل مجموع النقاط ل50 نقطة مثلا تسووا نشاط مسلي سوا، تروحوا السينما أو الملاهي أو حاجة مشابهة.

2. قسمي الألعاب لأربعة مجموعات:

• مجموعة للرمي (ألعاب مكسورة، تركيبات ناقصة منها قطع، .. الخ)

• مجموعة للبيع أو التبرع (ألعاب بحالة جيدة كبروا عليها أطفالك، ألعاب ما اتلعب بيها)

• مجموعة ألعاب حالتها جيدة كانت لطفلك الأكبر و تبغي تبقيها لطفلك الأصغر.

• مجموعة الألعاب اللي حتبقى عند طفلك.

1. نظفي الألعاب اللي حتبيعيها أو تتبرعي بيها، وحددي يوم في جدولك لبيعها أو لأخذها للمؤسسة الخيرية.

2. اختاري مكان لتخزين مجموعة الألعاب اللي حتبقى عند طفلك، يفضل في غرفة نومه. صنفي وخزني الألعاب حسب نوعها: ألعاب لوحية، كتب، ملابس تنكرية، مكعبات، ألعاب الشخصيات أو الدمى، الخ. استخدمي علب وصناديق شفافة حتى يقدر طفلك يعرف أماكن الألعاب اللي بيدور عنها بدون ما يفتحها. دائما خلي منطقة التخزين في ارتفاع مناسب لطفلك.

3. أكتبي محتويات العلب أو صوريها ولصقيها على العلب من برا بحيث يقدر طفلك يرجع كل الألعاب لأماكنها في المستقبل.

4. خزني الألعاب ذات القطع الصغيرة في مكان أعلى شوية، بعيد عن متناول أطفالك اللي عمرهم أقل من المناسب للعب بيها.

5. اتفقي مع أطفالك اللي أعمارهم مناسبة على أقصى مدة زمنية ممكن تنترك أي لعبة ما بيلعبوا فيها بدون ما تترجع مكانها، اذا انقضت المدة اللي حددتيها واللعبة برضها ما انشالت لمكانها احجزيها كم يوم في مكان تخصصيه للألعاب المحجوزة وما يلعب بيها طفلك مرة تانية إلا بعد ما تنتهي فترة الحجز. هذا الشي حيعلمه يلم أغراضه أول بأول.

نصايح متعلقة بترتيب ألعاب الأطفال:

• اعطي طفلك سلة أو شنطة خفيفة عشان يستخدمها لنقل الألعاب بين الغرف.

• دائما تذكري انه طفلك حينبسط بمحتوى وجودة الألعاب أكثر من انبساطه بعددها، فالأفضل يبقى عنده العاب ممتازة ومحدودة العدد بدل ما تكثر على حساب الجودة وتتركن على جنب ولا حتى يلاقي وقت يلعب بيها كلها.

• لو كان طفلك عنده ألعاب كثيرة لا تتركيها كلها في متناوله، قسميها جزئين أو ثلاثة واتركي له جزء واحد يلعب بيه وخزني الأجزاء الباقية في مكان بعيد عن طفلك و كل 3-6 اشهر لمي الألعاب اللي تركتيها له وخزنيها وطلعي بدالها من الألعاب المخزنة. بالطريقة هذه حب طفلك لألعابه حيتجدد لأنها حتوحشه وحيلعب بيها كأنها ألعاب جديدة.

• اطلبي من طفلك يركب كل التركيبات اللي عنده بشكل كامل واقلبيها ولوني ظهر كل تركيبة بلون مختلف، الشي دا حيساعدك ويساعد طفلك انه يجمع قطع التركيبة الواحدة مع بعض في وقت قصير. استخدمي الأكياس البلاستيكية القابلة لاعادة الفتح والغلق لحفظ قطع كل تركيبة بشكل منفصل.

• كوني حريصة انه رفوف الكتب الموجودة في غرفة أطفالك تتثبت بالجدار بالذات اذا كانت أعلى من مستوى الخصر بالنسبة لطول الطفل.

• حاولي تحدي من عدد الدباديب والحيوانات والدمى المحشية في البيت. احتفظي بس باللي لها قيمة معنوية خاصة و باللي يلعب بيها طفلك باستمرار.

• اذا كانت غرفة نوم طفلك وغرفة المعيشة في البيت في طابقين مختلفين، فخصصي ركن في غرفة المعيشة لتخزين بعض ألعاب طفلك فيه وبدليها باستمرار.

• مرة في الأسبوع اعطي طفلك سلة أو كيس كبير واطلبي منه يدور يجمع الألعاب من كل مكان في البيت ويرجعها لأماكنها المخصصة.

ان شاء الله تكون الأهداف و النصايح واضحة وبسيطة، بالنسبة لي أحسها شغلة بسيطة بس نتيجتها كبيرة لأنه تطبيق الأهداف حيخلي عدد الألعاب المتاحة وبالتالي حجم الفوضى الناتج عنها يتقلص بشكل كبير.

بالنسبة لتطبيقي لأهداف كل أسبوع ابتداءً من الأسبوع العاشر، صرت بأنزله بشكل فوري على ستوري الانستجرام حقي @ladyHblog وبأحفظه ناحية الهايلايتس في صفحة حسابي تحت البايو. فاللي ماشيين معايا بالأسابيع أو حتى اللي بدأت بعدي ومهتمة بالتطبيقات تقدر ترجع لها أي وقت.

وزي ما سويت الأسبوعين الماضية برضه حأكتب قائمة المهام المختصرة حقت هذا الأسبوع و أنزلها على الانستجرام، يصير اللي ما يمديهم يقرأوا الموضوع بشكل مفصل في المدونة ممكن يكتفوا بالاضطلاع على القائمة، واللي تحب تقرأ شرح كل نقطة وأمثلة عليها حتلاقيها هنا في المدونة.

أشوفكم على خيرXx

#ترتيب #تنظيم #أطفال #تحدي #كتابمترجم #نظميالآن #اسلوبحياة