كتاب: نظمي الآن! الأسبوع الثالث

طبعا أنا كربة منزل لمن جيت أطبق أهداف الاسبوع الماضي كان كثير من المهمات اللي سردتها في قوائمي المختلفة متعلق بترتيب و تنظيف البيت. ويطلع انه أهداف الأسبوع دا متعلقة بتنظيم جدول التنظيف تحديدا. وهو هذا بداية المشكلة عندي، جدول التنظيف والتسويف وكثرة الشغل علي بحكم انه ما عندي خادمة وانه أطفالي "صغار".

ما حأطول عليكم تفضلوا أهداف الأسبوع الثالث:

1- أكتبي قائمة بكل الأعمال اللي تحتاج تصير في البيت، قسميها لأعمال يومية وأسبوعية وشهرية. اعقدي اجتماع مع أفراد عائلتك ووزعي عليهم بعض الأعمال المناسبة حسب العمر واكتبيها في جدول يتعلق في مكان الكل يشوفه.

2- خلال التنظيف شيلي معاكي سلة فاضية تجمعي فيها من كل غرفة الأغراض اللي ما تنتمي للغرفة وفرغيها بعد الترتيب مباشرة لأنها لو جلست حتصير مكان تجمع لكل الفوضى اللي في البيت.

3- خصصي ربع ساعة في المسا قبل النوم لترتيب البيت، وبامكانك تضيفيها لجدول العائلة بحيث كل شخص يكون مسؤول عن غرفة مختلفة.

4- حددي غرفة أو شغلة وحدة(مسح الأسطح، الكنيس، تجميع القمامة..الخ) تخلصيها في اليوم، عشان لا تتكوم كل المهام في يوم واحد تقضيه بطوله بين الغرف والأشغال.

5- حددي لكل فرد من العائلة منشفة خاصة به يستخدمها طول الأسبوع، عشان تقللي من كمية الغسيل. ويفضل لو كان لكل شخص لون منشفة محدد بحيث ما تتخربط المناشف ببعض خلال الأسبوع.

6- اتركي في كل حمام علبة مناديل معقمة مطهرة- ديتول مثلا- بحيث أي بقع معجون أسنان أو حوادث بسيطة على كرسي الحمام تتنظف في وقتها ويستمر الحمام نظيف من الغسلة للغسلة.

7- اشتري من المنظفات المتعددة الاستخدام، حتوفري فلوسك ومساحة تخزين المنظفات الباقية.

ولا تنسوا تقرأوا النصايح اللي بتقترحها المؤلفة بخصوص تنظيم جدول التنظيف:

- رتبي سريرك قبل ما تخرجي من غرفة النوم وعودي عائلتك على هذه العادة.

- امسحي اسطح المطبخ و اشطفي الصحون وعبي غسالة الصحون وشغليها أول ما تنتهي من العشا.

- خلال ترتيب غرفة معينة ابدأي دائما من الأعلى للأسفل و من اليمين لليسارحتى تخلصي جزء جزء ولا ترجعي له.

- اذا عندك أطفال صغار أكتبي الأشغال اللي يقدروا يسووها( تفضية الطاولة، مزاوجة الشراريب، لم الألعاب من الأرض.. الخ)في - أوراق صغيرة وخليهم يسحبوا ورقة وحدة كل يوم وخليها سباق بينهم أو خليهم يحطوا ستيكر مكان الشغلة اللي انجزوها في جدول المهام المعلق.

- خلال الترتيب اتنقلي بين الغرف بصندوق قمامة كبير عشان تفضي فيه السلال الصغيرة اللي في كل غرفة بدل ما تاخدي كل سلة صغيرة من الغرفة حقتها لمكان الصندوق الكبير.

- أطلبي من أطفالك يختاروا اليوم اللي يبغوا يخصصوه من كل أسبوع لترتيب غرفتهم.

- شغلي أغانيك أو أناشيد أطفالك المفضلة خلال التنظيف والترتيب، حتعطيكم دفعة طاقة و نشاط.

- المرة الجاية اللي حتجددوا فيها الأرض أو البساط اختاروا ألوان غامقة أو منقوشة بحيث تتحمل الوسخ والبقع أكثر.

- اقضي الشغلات بالجملة، لا تمسحي بس مراية المدخل مدام في يدك البخاخ دوري بسرعة على باقي المرايات ولا تشبكي المكواة على حس قميص واحد جمعيهم و أكويهم لمن يصيروا 4-5 قمصان وهكذا.

حقيقة بعض النقاط ممتاااازة وبعضها أنا أختلف معاها في الرأي من تجربتي الخاصة. فالشي اللي جربته من قبل وأعرف انه يناسبني بطريقة مختلفة حأستمر على طريقتي فيه. لكن كل النقاط الباقية حأطبقها ان شاء الله هذا الأسبوع وأعطيكم خلاصة تجربتي باذن الله يوم الجمعة أو السبت المقبل.

أشوفكم على خير Xx

#نظمي_الآن #اسلوب_حياة #ترتيب #تنظيم #كتاب_مترجم #تحدي