كتاب: نظمي الآن! أهداف الأسبوع العاشر

بدأ الترم الثاني والحمدلله، ورجع الروتين اليومي الباعث على الاستقرار. ايوه، أنا من الأمهات اللي ينبسطوا برجعة المدرسة لأني مقتنعة انه الاجازة الغير مخططة هي مضيعة للوقت والجهد والطاقة البشرية. هذا غير اني ألاحظ انه بناتي يستمتعوا بأوقات فراغهم اللي تحصل لهم في أيام المدرسة و يقدروها و يستغلوها أفضل من أيام الاجازة الطويلة، عمركم لاحظتوا الشي دا في أطفالكم؟

انهيت الأسبوع التاسع من كتاب: نظمي الآن! و دونت تطبيقي لأهدافه ونزلتها قبل يومين (اقرأوها هنا)، اذا كان هذا أول موضوع تمروا عليه من السلسلة وحبيتوا ترجعوا لمواضيع الأسابيع السابقة اضغطوا رابط صفحة نظمي الآن تطلع لكم كل المواضيع السلسلة من الأحدث للأقدم.

اليوم حبيت أنزل لكم أهداف الأسبوع العاشر -على الوقت لأول مرة من فترة- عشان نبدأ الأسبوع سوا بجدول مرتب وواضح. هذا الأسبوع يختص بتنظيم المجلات والمطبوعات والجرايد، بالنسبة لي بيتي مافيه ولا ربع جريدة ولله الحمد لكن المجلات قد تكون بدأت تخرج عن السيطرة شوية.

أهداف الأسبوع العاشر هي كالتالي:

1. جمعي المجلات من كل غرف البيت واتخلصي من أي مجلة يزيد عمرها عن سنة.

2. جمعي كل الجرايد وارمي أي جريدة يزيد عمرها عن شهر.

3. ارمي أي مطبوعات انتهى موسمها سواء كاتالوجات أو منشورات العروض و التخفيضات، خليها عادة انك ترمي فورا كل المطبوعات التجارية التابعة لمحلات انتي ما تروحيها. خلال تصفحك لأي منشور لقيتي فيه غرض تبغي تشتريه: قصي فقط الجزئية اللي فيها الغرض اللي تبغيه واضيفيه لقائمة مهامك عشان تتذكري تشتريه قبل لا ينتهي العرض.

4. قصي المقالات أو الصور اللي تبغي تحتفظي بيها من المجلات اللي عندك وارمي الباقي.

5. حددي مكان واحد للمجلات في بيتك بحيث تتجمع فيه الأعداد الجديدة ونقحيه باستمرار.

6. الغي اشتراكك بالمجلات اللي ما صرتي تقرأيها وما صارت مقالاتها تهمك.

أما بالنسبة لنصايح الأسبوع العاشر:

• اذا ما بتلاقي وقت تقرأي مجلاتك المفضلة احتفظي بالعدد الأخير منها في السيارة أو في شنطة يدك، واتصفحيها وانتي بتنتظري دورك في الطابور أو غرف الانتظار.

• خزني الأعداد الأخيرة من مجلاتك على رف او جراب مجلات أو صندوق تخزين شكله مناسب مع ديكور الغرفة اللي حتحتفظي بالمجلات فيها.

• استخدمي ملف بجيوب قابل للتمدد للاحتفاظ بالمقالات المقصوصة وصنفيها حسب المواضيع: للقراءة، أطفال، ديكور البيت، الحديقة، .. الخ و بقي الملف هذا في مكان طارف عشان لا تنسي ترجعي للمقالات المشيولة فيه.

• لا تحسي بالذنب اذا اضطريتي كل بعد فترة ترمي مجلة بدون ما تقرأيها، التخلص منها حيفضي مكان في بيتك و في ذهنك ولا حتبقى في وجهك و تذكرك انك لسه ما قرأتيها.

• بامكانك تستفيدي من بعض الأوقات الضايعة بشكل خلاق: اقرأي مقال مقالين خلال الدعايات اللي تقطع برنامجك التفزيوني المفضل، أو خلال انتظارك في السيارة لأطفالك وقت خروجهم من المدرسة.

• اقرأي بس اللي يهمك من المقالات في المجلة: اطلعي على الفهرس عشان تعرفي أماكنها من المجلة بدل ما يضيع وقتك في تصفح المجلة بالكامل.

• اذا عندك كومة مجلات وجرايد على جنب عشان تقصي منها المقالات، سوي في نفسك معروف وامزعي الصفحات اللي تبغيها عشان تختفي الكومة بسرعة وبعدين رتبي الأطراف بالمقص لمن تلاقي وقت.

• في هذا الزمن صارت النسخة الالكترونية متوفرة من معظم المجلات، بالطريقة دي حتقللي الفوضى في البيت و حتحافظي على البيئة من الفضلات الورقية اللي بتستهلكيها.

وبس والله! بالاضافة لدا الموضوع المفصل حأبدأ أسبوعيا أنزل قائمة مهام مختصرة متعلقة بأهداف الأسبوع عالانستجرام لأني جربت انه تكون الأهداف مكتوبة قدامي على شكل نقاط قصيرة و بالمرة ناسبتني هذه الطريقة.

أشوفكم على خير Xx

#نظميالآن #تنظيم #ترتيب #تحدي #اسلوبحياة #كتابمترجم