كتاب: نظمي الآن! أهداف الأسبوع السادس

ستة أسابيع و بدأت مشاغل الحياة تسيطر على الجدول! أحس يبغالي أرجع أقرأ أهداف الأسبوع الأول والثاني عشان ادخل في العقلية المحفَّزة من جديد وأثبتها.

لازلنا هذا الأسبوع بنرتب المعلومات والمستندات لكن هذه المرة المتعلقة بالجانب المالي. ضروري اني أقول انه هنا في اختلاف كبير بيننا وبينهم لأنه مصرفيتنا احنا اسلامية ولأنه عادة اللي يسوي شغل الفواتير والميزانية هو الزوج أو الأب. لكن ما تتخيلوا قديش المعرفة العامة بالدخل والمصاريف مهمة بالنسبة للزوجة وحتى للأبناء الكبار: تساعد في تعزيز الاحساس بالمسؤولية تجاه الفلوس و بالتقدير تجاه الأب أو الزوج. قرأت في مكان ما انه الزوجة تصير مسؤولة أكثر في صرفها للراتب اذا كانت تعرف كم الدخل الشهري للزوج وايش المصاريف الشهرية المتوقعة كل شهر.

أهداف الأسبوع السادس:

1. جمعي كل الفواتيرالمهمة (المشتروات الكبيرة القيمة و المشتروات اللي ختم ضمانها على الفاتورة وكشف حساب البنك أو بطاقة الائتمان) وقرري فين حتحتفظي بيهم. سواء كنتي حتحتفظي بيهم في ملف وللا في صندوق وللا في سلة تأكدي انها كبيرة بمافيها الكفاية.

2. سجلي قائمة بكل مدخولاتك - مصروف أو مكافأة أو راتب أو مبيعات - ومصاريفك وتابعيها. ممكن تستخدمي برنامج الاكسل أو ببساطة تسجليها بالورقة والقلم: أهم شي يصير عندك تصور واضح لوضعك المالي. أمثلة للمصاريف اللي تستحق التسجيل والمتابعة:

• المصاريف الثابتة شهريا: الإيجار/القرض، فاتورة التليفون والجوال، الضرائب، فاتورة الكهرباء والموية، التأمين، مبلغ التوفيرالشهري. كقاعدة عامة: نسبة المصاريف الثابتة لازم ما تتعدى 65% من الدخل الشهري.

• المصاريف المتغيرة (تحتاج الى متابعة على الاقل لمدة 3 أشهر متتالية حتى ينعرف متوسط المدفوع فيها): صيانة البيت، المواصلات -بنزين، قيمة مواقف، مواصلات عامة.. الخ- ، متعلقات الاطفال - علاج، مدارس، أنشطة.. الخ- ، مدفوعات بطاقات ائتمانية، مشتروات الأكل، مدفوعات العناية الشخصية - مكياج، مستلزمات بشرة وشعر، زيارات الصالون أو الحلاق.. الخ- ، ترفيه وتمشيات ، عادات استهلاكية - قهوة ، سجاير.. الخ.

1. حسب المعلومات المجمعة في الخطوة السابقة حددي ميزانية شهرية بحيث نهاية كل شهر تكون مصروفاتك أقل من مدخولاتك ويفضل لو تحددي لنفسك توفير شهري أدنى بحيث يكون عندك مبلغ احتياطي بيزيد كل شهر للمصروفات الموسمية زي الهدايا أو السفر أو حتى لشراء حاجة قيمتها أكتر من انها تتاخد من مدخولات شهر واحد زي جوال جديد أو عطر غالي. اعيدي تقييم الميزانية مرة كل سنة.

2. جدولي وقت دفع الفواتير بحيث يتزامن مع نزول الراتب بحيث تتسدد بالكامل ولا يفاجئك شي في نص الشهر ما كنتي عاملة حسابه.

3. خططي لمستقبلك: افتحي حساب توفير واقتصي من راتبك أول الشهر مبلغ حدديه بحيث ما يضغطك ماديا وحوليه بانتظام والتزمي بيه.

4. افتحي حسابات توفير لكل واحد من أطفالك وحولي لهم فيه بشكل شهري مبلغ بسيط 100 أو 200 ريال وحطي لهم فيه عيدياتهم و كل الهدايا المادية اللي تنعطى لك بالنيابة عنهم. بالامكان تطبيقها هذه الفكرة أول ما يولد الطفل ويتجمع عندك مبلغ مالي من الهدايا النقدية اللي تجيكي بمناسبة الولادة. الحساب هذا يستخدمه الابن أو البنت لمن يستقل عن العائلة (دراسة أو زواج أو غيره..) أو ممكن الأهل يستخدموه لابنهم أو بنتهم لتغطية الزايد عن الميزانية المحددة لمصاريف الزواج أو الجامعة أو فستان الفرح .. الخ.

أهداف هذا الأسبوع أحسها معقدة وبعيدة جدا عن نظام حياتنا احنا العرب، لكن لو قرأناها بمنطقية حنلاقيها من أساسيات الحياة المالية الصحية، بحيث الواحد يتحكم في نزواته الشرائية ويحس بلذة الشروات المخططة بدون الاحساس بالذنب انه صرف مبلغ فوق طاقته، ويفهم عاداته المالية وفين بيصرف أغلب راتبه وهل في حاجات بيصرف عليها أكتر مما كان يتوقع.

طبقوا هدف واحد لكل يوم من أيام الأسبوع، لمن تطبقوها 1 في اليوم حتكون أسهل من لمن تحاولوا تطبقوا الستة في نفس الوقت.

أشوفكم على خير Xx

#نظميالآن #تنظيم #ترتيب #تحدي #كتابمترجم #اسلوبحياة