كتاب: نظمي الآن! أهداف الأسبوع السابع

لنا أسبوعين أهدافنا بتركز على تنظيم المستندات والمعاملات: الأسبوع الخامس كان عن ترتيب المستندات الشخصية والأسبوع السادس كان عن ترتيب الأولويات المالية.

الأسبوع هذا المؤلفة تطرقت لنظام دفع الفواتير، وهنا يختلف نظامهم عن نظامنا تماما.

أولا: احنا ما ندفع ضرايب، وبالتالي ما نحتاج اننا نحتفظ بالفواتير حقتنا ونرسل نسخ منها لمصلحة الضرايب عشان يرجعوا لنا جزء من الفلوس.

ثانيا: لمن يجيني عامل وللا اذا ركبت مطبخ وللا ضربت بويا بنحاسب اللي اشتغلوا عندنا فورا، يا اما مقدما أو بندفع للعامل نفسه وهو خارج. برا عندهم نظام انه يشتغل ويمشي وبعدين يرسل لهم الفاتورة - برضه الطريقة دي لها علاقة بالضرايب هو يحتاج انه الفاتورة تكون مسجلة في النظام والزبون يحتاج نسخة رسمية من الفاتورة عشان يرسلها لمصلحة الضرايب نهاية السنة المالية.

ثالثا: لسبب ما المؤلفة بتتكلم عن دفع الفواتير عن طريق البريد كاش أو شيكات واحنا ماعمره كان عندنا دا النظام، أهالينا كانوا يروحوا المصلحة ويسددوا الفواتير هناك وبعدين صارت البنوك تتولى التسديد فصرنا نروح البنك نسدد هناك وبعدين خلوا الصرافات وسيلة للتسديد وأخيرا زبطوا انظمتهم أون لاين وصار الواحد من بيته عن طريق موقع البنك بتسجيل الدخول في حسابه الشخصي يقدر انه يسدد كل فواتيره.

الفكرة انه بعض أهداف الأسبوع دا ما تنطبق على زمننا هذا، ولا على أنظمتنا المالية. لازلت حأترجمها لكن حأتركها بلون مختلف بحيث يبان معاكم ايش القابل والغير قابل للتطبيق من نظرة وحدة:

1. اختاري مكان مريح نفسيا لك تفتحي فيه فتحة سداد الفواتيرلأنه الواحد بدون شي حيكون متضايق هو يشوف حسابه البنكي ينقص فاتورة بعد فاتورة.

2. جهزي المكان اللي تختاريه بكل الحاجات اللي تحتاجيها خلال سدادك للفواتير:

• آلة حاسبة

• أظرف

• طوابع بريدية

• اقلام

• بطاقات لاصقة بعنوان الارجاع

1. تخلصي من أي أوراق متعلقة بقروضك السابقة اللي سددتيها بالكامل.

2. اذا كنتي مرتاحة لفكرة المصرفية الالكترونية فاستخدمي الموقع الالكتروني للبنك اللي بتتعاملي معاه لتسديد الفواتير. الطريقة هذه سهلة و سريعة و أفضل للبيئة لأنه ما يحتاج تستخدمي لا ظروف ولا أختام. وسددي فواتيرك فور صدورها عشان لا تتراكم ولا تنسيها.

3. خصصي موعد أسبوعي في منظمك الشخصي لتسديد فواتير كل أسبوع.

4. جربي هذه الطريقة: بعد ما تسددي أي فاتورة أكتبي عليها "مدفوعة" واحتفظي بيها مع باقي الفواتير المدفوعة في سلة أو علبة الى نهاية الشهر. أخر الشهر خرميها واحتفظي بيها في ملف مقسم الى الاقسام الفرعة اللي تحتاجيها (كهرباء، جوال، أقساط السيارة، اقساط رهن البيت... الخ).

5. ادفعي فواتيرك في وقتها، اذا ما تقدري ارسلي رسالة للجهة اللي بتطالبك بالسداد اشرحي فيها وضعك. ارسلي لهم مبلغ بسيط كل شهر حتى لو 5 دولار عشان يحسوا انك بتحاولي تسدديهم ومنتي مطنشتهم.

6. هذه قائمة تصنف لك المستندات المالية بحيث تعرفي تحتفظي بايش وترمي ايش:

• ايصالات الصراف: حطيها مع الفواتير اللي حتترسل للضرايب اذا تحتاجي أو اتخلصي منها

• كشوفات البطاقات الائتمانية: راجعيها بحيث ما يكون فيها أي مدفوعات غريبة واستخدميها لحساب مصروفاتك واحتفظي بس بآخر نسخة.

• بوليصات التأمين وفواتيرها: احتفظي فقط بأجدد وحدة وتخلصي من القديمة.

• الفواتير الطبية: احتفظي بيها لمدة ثلاث سنوات.

• فواتير سداد الرهن العقاري: احتفظي بيها طول فترة تملكك للبيت.

• فواتير بيع البيوت السابقة: احتفظي بيها في الملف.

• سجلات الضرايب: احتفظي بيها لمدة سبعة سنوات.

وبس والله!

عجبتني فكرة الملف المقسم للفواتير، مو بالضرورة للأقسام اللي هي قايلتها لكنها فكرة ارتب بكثير من اني اشيل الفواتير المهمة في علبة وللا صندوق. شكلي حأطبقها والله أعلم بس مافي أي شي تاني قابل للتطبيق الفعلي من الأهداف لأنها شوية تتعارض مع الأهداف حقت الأسبوع اللي قبل اللي كانت بتشجع على تسديد الفواتير كلها دفعة وحدة عند نزول الراتب مو بشكل اسبوعي.

حسيت معظم الكلام طلاسم ماهي متصلة بواقعنا احنا في الدول العربية، يمكن لو عشت برا كان استوعبت الأشياء المذكورة في أهداف اليوم بشكل أفضل.

ايش تعليقاتكم على أهداف دا الأسبوع؟ هل في شي منها أفادكم بشكل خاص؟ احب أسمع آراءكم.

أشوفكم على خيرXx

#تحدي #ترتيب #كتابمترجم #تنظيم #اسلوبحياة #نظميالآن