شغل يدوي: حفلة تقاعد عمي

عمي (أبو زوجي) انسان متفاني جدا في شغله وكان مكرّس كل وقته له، و نهاية يونيو الماضي كان آخر يوم له قبل التقاعد. طبعا كانت هذه المناسبة فرصة اننا نرتب له حفلة مفاجئة ونحاول اننا نفرح بيه ومعاه بانجازات حياته. أنا طبعا -كالعادة- اتطوعت اني أمسك الزينات والديكورات لكن كان عندنا مشكلة: احنا ساكنين في الخبر والحفلة ناويين نسويها في المدينة عشان سِت زوجي وعماته يحضروا معانا. فكان لازم اننا نتقيد بالزينة اللي سهل نقلها بالطيارة وهذا الشي حدنا كثير في الخيارات.

طبعا ما أخطط لأي حفلة بدون ما أرجع لPinterest أفضل مكان للأفكار والالهام. وطلعت منه بكم فكرة طبقتها بألوان شعار ارامكو بما انها الشركة اللي كان يشتغل فيها عمي. كان اجباري بالنسبة لي اني اختار حاجات سهلة التنفيذ في وقت قصير لاننا كنا حنسافر من الخبر للمدينة قبل الحفلة بوقت قصير وكان لازم في وحدة من الافكار اني اتنازل عن التصور اللي كان في بالي بس عشان نخلص في الوقت المناسب.

خلوني اوريكم فكرة فكرة .. التطبيق حقي حيكون في الصورالمرفقة واذا تحبوا تشوفوا الاصل في بنتريست اضغطوا على الصورة حتنفتح لكم صفحة جديدة تاخدكم لهناك

أول شي الهدايا: غلفنا كل شي بالأبيض وبعدين عشان نربط بألوان الثيم قصيت دوائر ورقية مختلفة المقاسات ولصقناها عشوائي (شكرا يا سموءة) على خيط أبيض ولفيناها على الهدايا

والباقي من هذه الدوائر استخدمناه عشان نزين الشوكولاتة (شكرا يا فنونة)

تاني شي قوارير الموية: اشترينا موية اكوافينا لأنه غطيها نفس لون الازرق اللي نبغاه ولفينا مكان ورقة الماركة اوراق ملونة بألوان الثيم

تالت شي المناديل: كتير احيان صعب انه الاكل يكون مزين بلون الثيم فعلى الأقل نضيف الالوان للسفرة باستخدام المناديل الملونة، بارتي لاند عنده ألوان واشكال مرة كثيرة

الشي اللي حسيت تعبي فيه كان في محله هو زينة السقف: الفكرة الأصلية برضه من بنتريست لكن نفذتها بألوان الثيم

الفكرة الأقل نجاحا واللي استغرق تنفيذها أطول وقت مع انه ما اشتغلت فيها لحالي هي فكرة الستارة/خلفية التصوير. المبدأ كمبدأ سليم وسهل لكن حتى نوصل لنتيجة نهائية مرضية كنا نحتاج وقت أطول وجداول أفضى. هل حأسويها مرة تانية؟ في بيتي يمكن، برا ما أظن.

وأخيرا وليس آخرا، ما تكتمل اي حفلة بدون الكيك: وصيت على كيكة أنيقة من حساب على الانستقرام اسمه حلويات صفاء طبعت لنا على وجه الكيكة شعار أرامكو فكانت هي الخاتمة المثالية لحفلتنا البسيطة.

وبس!

الأفكار كلها كانت بسيطة لكنها أضافت جو احتفالي رائع للبيت ولأنه الكل شارك في تحضيرها فكنا كلنا مبسوطين بالنتيجة النهائية للتحضيرات كلها.

أشوفكم على خير ، XO

#أشغاليدوية #زينة #حفلة #أخضروأبيضوأزرق #Pinterest #كيكة #بالونات #هدايا