جدول المهام المنزلية للأطفال

الجيل الجديد جيل اتكالي، مدلل ومرفه، متعودين كل شي يبغوه يتنفذ لهم ولا يبغوا يتعبوا نفسهم في أي شي. وحيستمر دا الوضع ويسوء لوما احنا الأهالي أمهات وآباء قررنا اننا نتصرف ونسوي شي بدا الخصوص.

أبسط شي ممكن نبدأ بيه هو اننا نعطيهم بعض المسؤوليات في البيت: هذا الشي حيغرس في نفوسهم بداية الرضا عن الذات الناتج عن الانجاز وحيساعد انهم يتعودوا يرتبوا مكانهم ويصيروا يحسوا بحجم الجهد المبذول من الأم والأب عادة حتي يفضل البيت مرتب ونظيف.

خلال ترجمتي لكتاب نظمي الآن! مريت على واحد من الأهداف في الأسبوع الثالث واللي كان يقترح انه الأبناء بتفاوت أعمارهم ممكن يساعدوا في شغل البيت بشرط انه يكون المطلوب منهم واضح ومكتوب قدامهم في مكان واضح ينشاف كل يوم.

ولأني مدمنة بنترست دخلت أدور أفكار هناك ومن صورة للثانية الين وصلت لهذا الموقع لقيت صاحبته موفرة جدول صوري للأطفال قابل للتحميل والطباعة. وشفت تطبيق هذه الأم للجدول المصورلأولادها باستخدام صواني الكوكيز:

وأخذت الفكرة وعدلتها بالمتوفر عندي - كل الأدوات المستخدمة اخذتها من ايكيا وجرير- وهذا اللي طلع معايا:

الأدوات:

لوح معدني SKURAR من (ايكيا)

مغناطيس SPONTAN من (ايكيا)

ورق جلاد فوشي - اختياري - (جرير)

مودبودج اللامع (جرير)

شريط لاصق ملون (ايكيا، جرير، دايسو)

الجدول المصور - نسختين على ورق طابعة ابيض

فرشة دهان ناعمة

مقص - أنا ما احتجته لأني استخدمت ماكينة الكاميو (امازون)

الخطوات:

1- بداية، مع انها عجبتني المهام اللي موجودة في الجدول الأصلي لكني حسيت انه بعضها ما يلزمني حاليا وحسيت انه في كم مهمة أبغى البنات يسووها ماهي موجودة. فحملت الجدول وعدلت عليه باستخدام الفوتوشوب وبعدين طبعت منه نسختين لأن بعض المهام أبغاها تتكرر وقصيت الدوائر بالكاميو. دهنت المغناطيسات بطبقة خفيفة من المود بودج ولصقت عليها الدوائر ودهنتها بطبقة خفيفة مودبودج فوق الدوائر. بعد ما نشفت تماما دهنت المغناطيسات كمان مرة بطبقة خفيفة أخيرة من المودبودج.

2- كتبت أسماء البنات بالكمبيوترورسمت مربعات فاضية تمثل المهام المطلوبة و مربعات في وسطها علامة صح تمثل المهام المنجزة وقصيتها من ورق الجلاد باستخدام الكاميو- بامكانكم تطبعوا كل شي على ورق عادي وتقصوه وتلصقوه.

3- خططت الجدول باستخدام الشريط اللاصق بحيث يكون فوق مكان الاسم وتحته جدول مكون من خانتين ولصقت الأسماء والمربعات الفاضية واللي فوسطها علامة الصح، وبكده صار جدولي جاهز.

وبس والله!

علقتها في مدخل المطبخ بحيث في الروحة والجية يمروا جنبها ويشوفوا ايش عليهم. طبعا المهام أنا أحددها لهم قبل لا يرجعوا من المدرسة وحسب المستجدات اليومية.

وحددت لهم هدف أسبوعي يوصلوا له بعدد المهام اللي ينجزوها في الأسبوع واذا وصلوا له يستحقوا جائزة بسيطة، الأسبوع الماضي كان الهدف 10 نقاط والجائزة كانت انه نلعب أنا وأبوهم معاهم لعبة ورقية اسمها "طار من عقلي" وفعلا وصلوا للهدف وكان احساسهم بالنصر واستمتاعهم بالجائزة واضح عليهم. ان شاء الله يستمر الحماس في الأسابيع الجاية.

اللي تتحمس تجرب فكرة الجدول وتسوي نسختها الخاصة منه ترسل لي صورة تطبيقها على الخاص في حساب الانستجرام التابع للمدونة ladyhblog@ مرة حيسعدني اني أشوف التطبيقات المختلفة وأستفيد من ابداعاتكم الشخصية.

أشوفكم على خير Xx

#Pinterest #ترتيب #أشغاليدوية #أطفال #اسلوبحياة #تنظيم