أفضل هدية للسنة الجديدة

أنا من الأشخاص اللي اتحين الفرص عشان أقدم هدية لأي شخص أحسه يستحقها. بالذات اذا كنت متأكدة انه الهدية حتفيده أو انها عاجبته بس ما يفكر يشتريها لنفسه. اليوم، وتماشيا مع النغمة اللي لي شهرين بأعزفها، حبيت أشارككم بالهدية اللي قدمتها لأختي: أم لطفلين ومؤسسة و شريكة في مشروع صغير ناجح ولله الحمد. الهدية كانت عبارة عن منظم #لدي_حلم و دفتر ستيكرات تستخدمه معاه أخذتهم من جرير.

طبعا كانت فرصة ما تتفوت اني أوظف الجانب الابداعي اللي في مخي، وهذا اللي طلع معايا:

حولت التغليف البني الى تغليف متناسق لونيا مع التغليف الذهبي اللامع باستخدام بعض أدواتي الفنية المفضلة موجودة في الصورة التالية وهي (من الأعلى للأسفل):

- تغليف بني (ايكيا - تويز ار اس)

- تغليف ذهبي لامع (جرير)

- أداة البودرة powder tool (موقع amazon.com)

- حبر الفيرسامارك versa mark ink (بديله من متجر موضي - amazon.com)

- بودرة الامبوسينق الذهبية gold embossing powder (نرسم دوت كوم -amazon.com)

- بلوك اكريليك (متجر موضي - فيل)

- شريطة بيضا بطرف ذهبي (بيبرمون)

- مجموعة أختام المنظمات (رسم وسم - فيل)

- مجفف حراري من مارثا ستيوارت ( بديله من متجرموضي - amazon.com)

- شريط لاصق بوجهين (الزامل)

الطريقة:

1- غلفت المنظم بالتغليف البني والاستكرات بالتغليف الذهبي و اخترت ختم "هيا ننجز" وختم النجمة الكبيرة والنجمة الصغيرة وثبتتهم على بلوك الأكريليك بالترتيب اللي ابغى اختمهم بيه. استخدمت أداة البودرة على كامل سطح الهدية عشان ما تمسك الفتافيت الذهبية على أي مكان مافيه حبر وحبرت الأختام الثلاثة بالفيرسا مارك و طبعتها على الركن العلوي اليمين.

2- شلت ختم "هيا ننجز" ورجعت حبرت النجوم و ختمت بيها باقي سطح الهدية، طبعا أحبر و أختم و أرجع أحبر وأختم، حبر الفيرسا مارك شفاف ودبق وفايدته انه تلصق عليه بودرة الامبوسينق

3- بعد ما ختمت النجوم بالتصميم اللي أبغاه، بسرعة جبت ورقة فاضية حطيتها تحت الهدية ورشيت بودرة الامبوسينق الذهبية على كل المناطق المختومة بالفيرسامارك، وبعدين رفعت الهدية وميلتها بحيث كل البودرة الفائضة تطيح على الورقة الفاضية اللي تحتها، عشان اثني الورقة وارجع بودرة الامبوسينق الغير مستخدمة في علبتها للاستخدام القادم.

4- بالمجفف الحراري، مريت على التصميم بالكامل وذوبت البودرة اللاصقة بالفيرسا مارك فصارت بارزة و لونها ذهبي لامع تقريبا نفس لون التغليف الذهبي اللي غلفت بيه الجزء الثاني من الهدية.

5 - باستخدام الشريط اللاصق ابو وجهين ثبت الهديتين مع بعض بشكل مائل شوية وربطتهم بالشريطة البيضا، وبس والله.

مرة حبيت النتيجة اللي طلعت معايا وحسيتها بينت الهدية أرقى مع انها بسيطة و بان عليها اني اهتميت بالتفاصيل الدقيقة اللي أعرف انه اختي حتنتبه لها وحتسعد بيها زيادة على سعادتها بالهدية نفسها.

اذا تحبوا هذا النوع من المواضيع أكتبوا لي في الكومنتات على صورة الهدية هذه عالانستجرام يصير أصور لكم اعمال أكتر واذا في أعمال معينة تحبوا اني اسويها ممكن تقترحوها علي هناك برضه.

أشوفكم على خير Xx

#أشغاليدوية #أنيق #زينة #هدايا