تغذية سليمة: وجبة الأرز بالدجاج
- Manar
- Sep 23, 2016
- 2 min read
Updated: Nov 21, 2018
أصغر بناتي كملت 9 شهور الاسبوع الماضي, عشان كده ضروري ابدأ ادخل لها اللحوم في نظامها الغذائي واختياري لهذي الوصفة هو الدجاج: مسلوق ومقطع صغاااارمضاف لوصفة رز بسيطة نكهتها لذيذة و قيمتها الغذائية عالية.
استخدمت رز طويل الحبة بس شكلي ما حأرجع للنوع دا الا لمن يطلع لها أسنان. النكهات اللي اضفتها امتزت مع بعض بطريقة رائعة لدرجة اني بأفكر اعتمدها وصفة عشا لكل العيلة (طبعا الدجاج ما حيكون مفتفت قد كده) اتفضلوا الوصفة لو تحبوا تجربوها
المقادير* تسوي 3 وجبات مقاس طفل عمره 9 شهور
نص جزرة, مقشرة ومقطعة مكعبات 2 سم
حبة كوسى صغيرة, مقشرة ومقطعة مكعبات 2 سم
حبة بطاطس صغيرة, مقشرة ومقطعة مكعبات 2 سم
فخذ دجاجة, مسلوق ومقطع صغار و احتفظت بموية السلق
ملعقة كبيرة زيت زيتون
فص ثوم, مهروس
ربع بصلة بيضا, مفروم ناعم
حبة طماطم صغيرة, معصورة
ثلث كوب رز طويل الحبة
رشة ملح
ربع ملعقة صغيرة كركم
*المقادير تسوي 3 حصص لطفل بعمر 9 شهور
الطريقة
سلقت الجزر والكوسى والبطاطس مع بعض بالبخارلمدة 15-20 دقيقة الين اتأكدت من نضجهم وطحنتهم حتى صار قوامهم زي معجون الطماطم - ناعم وثقيل
خلال ما الخضار بتنسلق حطيت زيت الزيتون في قدر صغير وانتظرت حتى حمي وأضفت عليه البصل والثوم وقلبته الين ذبل البصل بس ما اتحمر واضفت عليه مرقة
الدجاج وخليتها عالنار الين تبدأ تغلي
اضفت الرز عالقدر اللي بيغلي و زدته موية حارة الين صار مستوى الموية أعلى من مستوى الرز بأصباعين وتركته يغلي على نار متوسطة حتى صارت الموية تحت مستوى الرز لكن لسه ما اتشربها الرز تماما. أضفت الخضار المطحونة والدجاج المقطع الى الرز
رشيت الملح والكركم وشوية موية وقلبت محتويات القدر مرتين ثلاثة بس الين اتوزع كل شي بالتساوي. هديت النار وغطيت القدروكل كم دقيقة كنت اشيك عليه الين اتشرب الرز كامل الموية
!وبس
طبعا اتأكدوا من انه الأكل برد لحد درجة حرارة الغرفة أو أدفى بس بتكة عشان لا تتسببوا لبيبياتكم باصابات بالامكان الاستغناء عنها
أتمنى تكونوا استمتعتوا بقراءة الموضوع دا قد ما أنا استمتعت بكتابته لكم, واذا في أي ملاحظات أو استفسارات رجاء اتركوا لي هي في كومنت تحت الموضوع وحأرد عليكم في أقرب فرصة ممكنة
XO,أشوفكم بخير
Comments