استحمام دافئ في عز البرد

كلنا نشيل هم الترويش في الشتا ، بالذات ترويش الأطفال ، وبالذات اذا كان البيت بارد والحمامات -وانتو بكرامة- مثلجة. انا أم لثلاثة بنات (الله يحفظهم) أصغرهم عمرها سنتين، فتجاربي السابقة مع اخواتها ومعاها والنصايح اللي اعطوني هي الناس ايام ما كنت أم جديدة ساعدتني انه اتعامل مع دا الموضوع بسلاسة وبسهولة.

سواء كنتي أم جديدة أو على وشك تصيري أم اقرأي النصايح الجاية وادعي لي، واذا كنتي أم خبيرة شوفي ايش من دي النصايح انتي بتطبقيه وايش عندك نصايح اضافية ممكن تضيفيها على القائمة:

1- دفّي المكان:

قبل ما تدخلي طفلك للحمام عشان الترويش، اسحبي دفاية من اي مكان من البيت وشغليها في الحمام وقفلي الباب. ارجعي لها بعد نص ساعة وقدري اذا درجة الحرارة في المكان صارت مناسبة وللا لسه. طبعا لو كان طفلك حديث الولادة ما يحتاج تاخديه للحمام البارد بامكانك تشتري من البانيوهات الصغيرة يصير تقدري تروشيه في وسط البيت في مكان أدفى.

2- خدي معاك كل اللي تحتاجيه:

- جهزي كل المستحضرات اللي حتستخدميها : شامبو، بلسم ، سائل الفقاقيع ، صابونة ، بودرة ، زيت الأطفال ، لوشن..الخ

- جهزي كل قطع الملابس اللي حيلبسها طفلك حسب البرد ودرجة الحرارة برا الحمام: فنيلة داخلية، ليجينجز، هيلاهوب -تايتس- ، شراب ، بلوزة كم قصير، بلوزة خفيفة كم طويل، البنطلون أو التنورة والبلوزة أو الفستان أو البيجامة.

- جهزي منشفة و روب ترويش أو منشفتين بحيث وحدة يتلف فيها من قدام ووحدة من ورا. يصير وقت تلبيس الحفوضة يبقى صدر وبطن الطفل مغطيين.

- دخلي معاكي ألعاب وفرشة شعر و استشوار اذا تحتاجيه (شوفي النقطة 5).

3- خصصي مناطق العمل:

- بعدي الدفاية لأبعد منطقة عن الموية عشان اسباب متعلقة بالسلامة، وخصصي هذيك المنطقة للتنشيف واللبس بعد الترويش، جهزيها بمفرشة أو دعاسة نظيفة تسدحي عليها الطفل وقت ما بتلبسيه و اختاري لعبتين من العاب طفلك المفضلة وحطيها على الدعاسة بحيث يلعب فيها وينشغل وقت اللبس.

- وزعي الحاجات اللي جبتيها معاكي من برا حسب أماكن استخدامها الشامبو والبلسم والصابون وغيرها خليها عند البانيو والكريم والزيت والبودرة مثلا عند منطقة اللبس اللي جنب الدفاية.

- افردي الروب أو وحدة من المناشف على الدفاية مع الحذر انك ما تغطي فتحات التهوية حقتها و رصي الملابس قريب منها:

بحيث اذا لبستي طفلك الروب تقدري بسرعة تحطي الملابس لفترة قصيرة على الدفاية عبال ما تنشفيه وتلبسيه قطعة قطعة. تأكدي انه الطقاطق والأزارير المعدنية ما تلمس الدفاية عشان لا تقدح وتلسعك انتي أو طفلك.

4- لا تسمحي بالالعاب وسط البانيو:

الجو بارد والموية الدافية ممكن تخلص عليكم لو طولتوا في الترويش، غير انه ممكن متعته بالالعاب اللي في منطقة اللبس تتأثر اذا كان في باله الألعاب اللي في البانيو.

5- استخدمي مجفف الشعر:

اذا كان شعر طفلك طويل أو كثيف ضروري انه ما يخرج من الحمام الدافي وشعره مبلول، مشطي شعره عشان تتفكك العقد بعدين شغلي الاستشوارعلى أبرد حرارة ممكنة ووجهيه من بعيد على شعر طفلك مو على فروة راسه (في دراسات تنبه انه بصيلات شعرالأطفال ممكن تتأثر بالحرارة و ما تتجدد) ووقفي تنشيف لمن يصير شعر طفلك شبه ناشف "نديان"

6- افتحي الباب بالتدريج:

بعد ما تلبسي طفلك أول طبقة من ملابسه (فنيلة وبلوزة خفيفة وليجينجز، مثلا) افتحي الباب فتحة صفيرة وطفي الدفاية. بعد ما تلبسيه الطبقة التانية وسعي فتحة الباب لربع المسافة وقبل ما تشغلي الاستشوار افتحي الباب لنص المسافة، بحيث يدخل الهوا البارد بالتدريج وما يفضل طفلك بطبقات من الملابس في مكان دافي ممكن يعرق فيها وينصفق اذا خرج ويمرض.

وبس والله..!!

هذه أهم النصايح اللي تخطر على بالي واللي انا بأطبقها بخصوص موضوع ترويش الأطفال في الشتا، ايش بتسووا منها؟ ايش بتسووا بدالها؟ وايش عندكم نصايح تانية لها علاقة بدا الموضوع؟ أحب اسمع منكم في التعليقات.

#بيبي #أطفال #اسلوبحياة #شتاء #اسألمجرب