اسأل مجرب: عربة اليويو+ من BabyZen

 photo credit: babyzen.com

قبل لا أبدأ لازم أقول دا: أنا مقتنعة تماما بمقولة الرخيص نغيص والغالي سعره فيه .. بالذات في الحاجات اللي عليها استخدام كثيف

وعشان كده كانت اليويو من ضمن الخيارات اللي فكرت فيها لمن احتجت عربية جديدة لبنتي.

أهم المواصفات اللي كنت أدور عليها وكانت منطبقة على اليويو هي:

1- وزنها خفيف.

2- صغيرة لمن تنطبق.

3- ظهرها يتسدح بشكل شبه مستوي.

4- حركتها ودورانها ناعم وعجلاتها ما تعلق خلال المشي.

مميزات لقيتها في اليويو ماكنت أدور عليها بس مبسوطة انها فيها:

- فيها شباك بلاستيك شفاف اشوف من خلاله بنتي حتى والمظلة مفرودة.

- فيها جيب كبير بسحاب اقدر أحط فيه جوالي بحيث أسمعه وأنا ماشية في السوق.

- الحزام مبطن من منطقة الكتف والصدر وبين الرجلين فأحسها اريح لبنتي.

- أقدر أطلعها معايا الطيارة بدون ما ياخذوها مني عند الباب لأنها تصير بحجم شنطة سفر صغيرة.

عيوب اكتشفتها بعد ما استخدمت اليويو فترة:

- خلال ما بأطبقها ممكن ما تنقفل بسهولة بسبب انه العجلات تكون مبرومة بطريقة ما تسمح بانها تتداخل في بعض - الحل اني ألف العجلات بيدي عشان تبعد عن طريق القفلة لكن دا الشي يزيد الوقت اللي المفروض تاخده عملية التطبيق وانا متأكدة انه اذا ورانا طابور بدهم يركبوا طيارة وللا باص حنضايقهم بتأخيرنا وممكن ناخد لنا نظرات أو كلمات ما تعجبنا.

- الحزام من النوعية اللي تكون قطعتين تركبيهم في بعض وبعدين تربطي بهم الحزام وهذه أنا ما أفضلها في أحزمة اأطفال لأنهم أحيانا يكونوا ماهم موافقين عالحبسة في العربية فوقتها لو كانت كل جهة تتربط لحالها يكون أفضل وعملي أكثر.

- ما لقيت  في المحل اللي اشتريتها منه اكسسوار لها يساعدني على تعليق أكياس التسوق حقتي ولا السلة اللي تحتها كبيرة كفاية للتسوق اللي تحتاجي تخففي من حملتك خلاله.

هل العيوب اللي اكتشفتها خلال الاستخدام حتمنعني اني انصح بها أي أحد يسألني عنها؟ أو لو كنت اعرفها قبل لا اشتريها هل كنت حأبطل آخدها؟ لا طبعا..

مميزاتها في نظري تفوق عيوبها بمراحل ولهذا فتقييمي لها هو 4 من أصل 5 نجوم

يبقى بس أقول لكم انها تباع حسب العمر، اللي اشتريتها أنا مناسبة لعمر 6 أشهر فما فوق لكن عندهم فريم للعربة يركب عليه مهد ويركب عليه كرسي سيارة فتصير مناسبة من الولادة. هذا بالاضافة للألوان المختلفة اللي تتوفر بها التلبيسة الداخلية و المظلة بحيث بامكانكم تشتروها منفصلة وتغيروا لون العربية بعد فترة من الاستخدام.

العربة موجودة عند محلات مذركير في الشرق الأوسط وتباع بسعر 2200 ريال سعودي تقريبا.

#مميزات #تقييم #عيوب #بيبي #اسألمجرب