في بيتنا عروسة : بوتيكات العرايس في الخبر
- Manar
- Sep 19, 2017
- 3 min read
أهم جزء من الاستعداد بالنسبة للعروسة هو الفستان وملحقاته، وسهولة تحصيله تعتمد على مستوى تشرط العروسة والتصور المسبق اللي في بالها. لسبب ما، شكله انه البوتيكات في الخبر كل مالها بتتناقص، وأنا وأخواتي طلعت عيوننا واحنا ندور عنها.
بسبب الدوخة اللي دخناها دي، قررت اني أكتب موضوع ألخص فيه المحلات اللي مريناها في فترة الشهر الماضي وتجربتنا في كل واحد منها.. يمكن أوفر على وحدة بتدور شوية وقت وتبقى مرجع ليا اذا أحد سألني مستقبلا.
بوتيك روشيه
من أوائل البوتيكات اللي زرناها بسبب موقعه الاستراتيجي في مجمع الشارع السابع 7th Avenue وبسبب انهم يفتحوا في الصباح فاستفتحنا يومنا بهم.
ساعات العمل:
9:30 صباحا - 12:00 ظهرا
4:00 مساءا - 10:00 مساءا
ماركاتهم:
لمن سألتهم عن الماركات اللي يتعاملوا معاها قالت لي تلاقيها عالانستجرام، لكن للأسف ماركات فساتين العرايس ماكانت ظاهرة على الصور. أما بالنسبة لفساتين المناسبات فهذه الماركات اللي لقيتها على حسابهم:
مميزاتهم:
فساتينهم مرة حلوة: عندهم قسم عرائس وقسم مناسبات وبعض فساتين الشبكة.
الموظفة العسل "عفاف" تعاملها ذووووق لأبعد حد الله يسعدها؛ كانت بدون منازع أرقى موظفة مرت علينا بين كل البوتيكات.
أسعارهم كانت ضمن ميزانية عروستنا وأعطتنا سعر مخفض للجابون والطرحة.
عيوبهم:
ماعندهم خياطة في المحل: يتعاملوا مع خياطة من برا ويكلموها وقت الحاجة فلازم ترجعي لهم بعد ما يرتبوا لك موعد مع الخياطة عشان أي تعديلات في الفستان.
عندهم حبة من كل موديل، في ناس تعتبر الشي دا ميزة عشان مايكون الفستان مكرر لكن بالنسبة لنا تكرر انه يعجبنا الفستان ويكون المقاس المتوفر مو مناسب على عروستنا.
الدور السفلي مكتظ بالفساتين ويعطي احساس بالفوضى.
بوتيك لاماري
بوتيك في منطقة غير متوقعة، في حي العليا ناحية مطعم بيز و دكان الشوكولاتة. صاحبة المحل تداوم بنفسها عشان تضمن رضا زباينها ومعاملتهم بالطريقة اللي تعكس أفضل صورة عن المحل.
ساعات العمل:
5:00 مساءا - 10:00 مساءا
ماركاتهم:
مميزاتهم:
فساتينهم تجنن والتشكيلة اللي عندهم واسعة على صغر المحل، وعندهم فساتين بالطلب من الماركات اللي يتعاملوا معاها.
جو المحل يعطي احساس بالإهتمام بالزبون وصاحبة المحل مستعدة لتلبية طلبات أصعب العرايس.
عندهم خياطة تسوي التعديلات على ضمانة المحل، فصلت لعروستنا جابون فستانها على طلبها بالنفشة اللي تبغاها.
أسعارهم مرة حلوة وعروستنا اشترت من عندهم بدون تردد.
عيوبهم:
دوامهم مسائي فقط من 5:00 العصر الى 10:00 المساء.
صاحبة المحل موظفة، مع انه الشي دا كبرها في عيوننا الا انه غصبا عنها يأثر على دوامها في المحل وبالتالي ممكن تقفل بدري وتمشي أو نكلمها نبغى نستلم الأغراض وتأجلنا يوم أو يومين لأنه جدولها مضغوط.
بوتيك لادنتيلا
من أكبر البوتيكات اللي دخلناها في جولتنا و بصراحة ماله منافس من ناحية الانطباع الاول: البوتيك مبهر والفساتين على امتداد الجدران وغرفة القياس بابها على "كوشة" وممر عشان العروسة تتخيل الوضع حق يوم الفرح مزبوط وتعيش الجو.
ساعات العمل:
10:00 صباحا - 12:00 ظهرا
4:00 مساءا - 10:00 مساءا
ماركاتهم:
مميزاتهم:
أسعارهم لفساتين العرايس جدا مغرية وتتراوح بين 4500 و 8000 ريال.
جو البوتيك روعة عرائسي لأبعد درجة ومريح حتى لمرافقات العروسة.
التشكيلة الموجودة كبييييرة وعندهم كاتالوجات للماركات اللي يتعاملوا معاها بحيث تقدر العروسة تطلب حتى الفساتين اللي مومعروضة.
عندهم تشكيلة فساتين سهرة.
عندهم خياطة - حقيقة مافهمت اذا موجودة في المحل وللا من برا - وممكن يسووا أي تعديلات تبغاها العروسة عالفستان.
عيوبهم:
المدة اللي تحتاجها طلبية الفساتين من كاتالوجاتهم طويلة نسبيا: شهرين الى ثلاثة شهور.
حسب ما فهمت من الموظفة اللي سألتها: كل الفساتين في المحل مقاس واحد، واللي تبغى مقاس مختلف يعدلوه عليها. ماهو عيب كبير اذا كان الفرق في المقاس بسيط لكن كيف لو كان الفرق مقاسين أو أكثر؟!
على انه فكرة الممر رائعة الا انه اي أحد يدخل البوتيك يقدر يتفرج على العرايس لأنه في نص المحل.
بوتيك رهيد
طبعا بوتيك رهيد من أشهر بوتيكات العرايس في المملكة وفساتينهم كلها من تصميم المصمم فهد اسماعيل. لهم فروع في الخبر والرياض وجدة و أتوقع دبي كمان و بوتيكاتهم دائما فخمة وراقية.
ساعات العمل:
10:00 صباحا - 10:30 مساءا
مميزاتهم:
فساتينهم فخخخخخخخمة تعطي احساس الأميرات بدون أي مبالغة، الأقمشة والتطريز والنفشة خيالية.
غرفة القياس خاصة بعيد عن عيون المتطفلين وفيها جزء للبس ورا ستارة وكرسي خارج الستارة للمرافقات
عندهم خياطنهم الخاصة ومستعدين لأي تعديلات على الفساتين: طول ـ عرض - أكمام - تبطين .. الخ
عندهم تشكيلة ملابس سهرات و فساتين شبكات.
عيوبهم:
أسعارهم للأشياء اللي سألناهم عنها كانت مررررة غاااالية ، الفستان لحاله 9500 واذا تبغي الطرحة و الجابون والتاج توصل مدري كم. بس للأمانة الفستان ما عمري شفت بجماله لكنه كان فوق الميزانية.
خياطتهم مزحووومة التعديلات بالقليل تاخد اسبوعين الى شهر ونص.
ممنووووع التصوييير ولا في أي جزء من البوتيك. احنا استأذنا بشكل خاص لأنه ماما ما كانت معانا وكان ضروري تشوف الفستان.
أتمنى أكون أختصرت المعلومات بشكل واضح وخفيف، بعض المعلومات أخذتها عن طريق التواصل المباشر مع البوتيكات وبعضها من تجربتنا الشخصية لعروستنا. اذا عندكم أي اسئلة ما شملتها في تلخيصي رجاء اسألوها قد أكون أعرف المعلومة وفات عليا اني أذكرها أو أكون ما أعرفها ووقتها حأتصل عليهم وأجيب لكم الاجابة.
أشوفكم على خير..Xx
コメント